加入最愛專欄  收藏文章 

2023-01-23

廚藝高手「懷舊龍」

  農曆新年前後,食乜菜?當然懷舊廣東菜,咁至有feel(難道食西餐乎,傻的嗎?)。

 

  上周,大班老友團年,早早半年前已定下日子!點解半年前,有冇誇張啲呀?

 

  冇!因呢間大寶號,話明最少輪半年。正是皇仁舊生會中菜部。

 

  有乜咁巴鬼閉呀?答案三個字——平、靚、正。

 

  平。因此處屬自己物業,毋須畀吸血業主斬。再加是舊生會,只做自己人生意,慳返好多商營支出。

 

  靚。因此店踏踏實實,一切不講花巧,晚晚爆瀉。數十年大手入貨的穩定熟客,供應商當然優先提供最佳材料,包括海鮮、鮑魚、鵝掌、肉類……

 

  正。有好料都要講靈魂人物——大廚的功力。此處掌門人為廚藝大師梁文龍。數十年如一日,晚晚主攻十幾味懷舊大菜,早早成「精」,一如陸羽茶室的禢智明,講做拿手招牌菜,香港邊個夠佢兩位大師揮?

 

懷舊菜聖手梁文龍

 

  到皇仁舊生會歎美食,你根本無需思考菜單。總之,次次指定食吓啦,包括:一、原盅鮑魚佛跳牆(湯底絕無味精,因料多到迫爆煲,經長時間慢火燉,所有老雞、火腿、瑤柱、鮑魚……味完全逼出,一啖入口,神仙企唔穩! )

 

真材實料迫爆煲的佛跳牆

 

  二、脆皮炸子雞(間間食肆都話用新鮮雞。但梁師傅入的貨,遠遠彈離對手。雞味濃,雞肉又嫩又滑,炸後雞皮香噴噴脆卜卜,一啖紅酒一啖雞,人間何世?)

 

這隻脆皮炸子雞,肯定獨步香港

 

  三、柚皮生扣鵝掌(柚皮入味,厚而綿。鵝掌又肥又大,炆到剛剛離骨,冇牙佬都有高度享受!)

 

肥厚柚皮扣軟綿綿鵝掌

 

  四、蜜餞金蠔(用最上等金蠔,隻隻蠔身飽滿,被又甜又膠口的蜜餞包著,外脆內軟,味濃,宜以遠年威士忌佐之!)

 

看賣相已經流晒口水的蜜餞金蠔

 

  五、古法羊腩煲(只得冬季提供,故夏季要先訂位。羊腩件件起滿膏,歎此味菜,千祈要暫時將減肥、血壓高、膽固醇……等等所謂「健康問題」拋諸腦後。反正並非晚晚食,一於死就死,連皮連腩部厚厚脂肪大口大口吞,只有這種食法,可感極度痛快。然後,未來三日節食可也!) 

 

歎這煲古法羊腩,要先將「健康」置諸度外

 

  六、生劏白鱔荷葉蒸飯(白鱔件件彈牙,指定生劏不可入過冰櫃。用優質荷葉盛載絲苗米蒸之,上枱時,荷葉幽香襯托白鱔鮮味,再飽都會流口水!)

 

臨尾來碗鮮荷葉白鱔碗,真完美

 

  以上六款為必食。仍有胃納,可點原隻蝦多士、大班兩味——清蒸斑腩、煎焗魚頭、八寶鴨、蟹粉豆苗及生炒糯米飯。

 

原隻蝦多士,酥、脆、香

蟹粉將豆苗全面封冚

 

  平均消費$600左右,怎不排大隊呢?仲有仲有,保證你沒法全部清碟,人人走時,必紅光滿面挽著一袋二袋打包離開,快樂到不得了。

 

皇仁舊生會中菜部

地址:香港銅鑼灣高士威道102號

電話:2576 1333(限皇仁舊生訂位。你總會識到一位的!)

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多肥碌大食遊文章
你可能感興趣
#皇仁舊生會中菜部 #銅鑼灣 #懷舊廣東菜 #廣東菜 #梁文龍 #佛跳牆 #炸子雞 #扣鵝掌 #羊腩煲 #白鱔荷葉蒸飯 #蝦多士 #美食地圖 #試食報告 #名店
編輯推介
即時報價
全文搜索
Search
最近搜看
雙幣交易
財政預算案2024-25
More
Share