世事政情

2018-03-19

軒仔騎馬仔扮騎師麥偉利花生友：唔做諧星嘥晒！

　　【晴報專訊】將於六月舉行三場紅館騷的張敬軒（軒仔），近日頻頻出招谷個唱。日前他拍片惡搞南非騎師麥偉利，化身騎師Look的送碟專員並攜同網上購買的「愛駒Dahlia」快閃旺角，玩謝一班粉絲。不少人高呼其造型超低能勁搞笑，激讚軒仔唔做諧星堅浪費！

　　軒仔曾聲稱2018年是其「找數年」，他早前已找了第一條街數「出廣東碟及國語碟」。日前，他再在FB宣布「還債」送碟給粉絲︰「留言寫出張敬軒嘅三個優點，並加以說明。」前日，他便化身騎師Look送碟專員空降旺角，即晚將「晒馬」片Po上網，其一身造型模仿與他樣子極似的騎師麥偉利，又孖「愛駒Dahlia」到場，更找來麥長青（麥包）助陣做臨記，誠意十足。

軒仔找來麥包搞一場派碟大龍鳳谷新碟及演唱會，最後與歌迷影大合照留念。

英國訂戲服屋企練笑容

化身騎師的軒仔，騎住「愛駒Dahlia」抵達球場時，即向著粉絲的方向興奮地策騎，心情異常激動。

　　軒仔騎著Dahila闖入麥花臣球場時，極速成為焦點，更不時興奮大叫。現場有小妹妹手痕摸Dahlia馬尾，軒仔忍不住吶喊︰「邊個抆我條嘢？妹妹唔好抆我條嘢！」

南非騎師麥偉利

　　事後軒仔高呼好玩，提到化身麥偉利，他回應︰「自從扮過Emma Watson（愛瑪屈臣）後，好多人都話我似麥偉利。今次送碟就想用一個特別方法。」軒仔並透露︰「隻馬係喺網上買番嚟，套衫係特別喺英國訂。我喺屋企練過麥偉利嘅笑容，同埋佢嘅『OK』signature動作。」短片一夜間在社交網錄得逾十萬點擊，很多樂迷瘋狂派Like，聲言好笑到標眼水；有網民則取笑軒仔有病要睇醫生。