【晴報專訊】麥包、金剛主持的ViuTV真人騷《C9旅行團》前晚首播，二人帶領12位香港師奶玩轉台灣，身為「地頭蟲」的金剛在首集已向團友送抱又唱歌，麥包亦勁投入做足領隊本份，不少網民稱讚節目有笑點；有人亦喜見一班師奶玩謝兩位大叔，大叫好過癮！

 

 

　　ViuTV的《C9旅行團》與TVB新一輯《阿爺廚房》前晚同時段首播，麥包、金剛與「阿爺」李家鼎作正面交鋒。《C9旅行團》中，兩位無綫舊將率領12位師奶玩轉台灣，首集已考起領隊初哥麥包，節目組竟然瞞住他安排其中一名團友先到台灣，令他誤以為該團友遲到甩底，可幸麥包全程表現冷靜，未有發火。

 

麥包笑言有100%收視

 

麥包與金剛帶領師奶們穿旗袍影相，重拾青春回憶。（電視截圖）

 

　　身為台灣人的金剛，特意在台北機場守候團友，這位新手導遊除了幫忙團友搬行李，又大方送上愛的抱抱給每位靚姐，更在旅遊車上一展歌喉，以他唔鹹唔淡的廣東話高唱《相逢何必曾相識》，大放笑彈。至於昨晚播出的第二集，二人就帶住12位師奶到訪旗袍店，眾人爭先恐後揀選心頭好，穿上美麗旗袍影靚相，表現瘋狂。

 

金剛徇眾要求獻歌聲，他為了冧一班靚姐開心，果然義不容辭。（電視截圖）

 

　　下周三踏入52歲的麥包，前晚與這班師奶團友聚餐睇首播，他在FB上載大合照兼留言︰「C9又聚頭，昨晚約埋班師奶一齊睇首播，係開心嘅！係興奮嘅！喺充滿回憶嘅！而金剛因工作未能出席，只能不停在WhatsApp問好睇嗎？收視幾多？我答佢『現在100%收視，因兩台（兩張枱）的台前幕後都在收睇中！期待下餐慶功宴！』」

 

麥包昨午出席「領展商戶學堂」研討會談生意經，揚言與朋友合資搞生意，盡量避免不歡而散。

 

　　很多網友Like爆兩位主持客串帶團夠投入；有觀眾亦讚麥包和金剛成功與師奶們擦出火花。

 

 

轉載自: 晴報

• 

etnet榮獲HKEX Awards 2023 「最佳表現證券數據供應商」大獎► 了解詳情