【晴報專訊】《堅離地愛堅離地》將於本周日（24日）播映大結局，在劇中飾演奇異果博士的何遠東，當時的肥仔，現在fit了；還有跟劇中一班演員，每日開工嘻嘻哈哈。對於劇集進入尾聲，他坦言唔捨得。

（右起）何遠東很難忘與唐嘉麟、方紹聰和張振朗拍劇集時一起度笑位。

　　何遠東指《堅離地愛堅離地》已是三年前的舊作，拍攝時一班演員也相處得非常開心，「我哋成班人每日埋位就扭盡六壬，諗下點先可以達到搞笑效果，試過好幾次都因為忍唔到笑頻頻NG，拖慢進度！」阿東最開心是與張振朗、方紹聰和唐嘉麟四個男仔的群戲，往往擦出火花，「我哋成日諗計互相搶鏡，但絕對唔會爭到唔咬弦。有場戲講我哋見到黃心穎生滋貓入眼，我睇到流鼻血，於是我搵張紙巾，將其中一角用紅色marker油咗去，再塞入個鼻，拉出嚟就好似流鼻血咁。」

　　劇集曾被抽起到終於播出，阿東稱經歷了許多風波，「好難得拍完成部劇都沒有是非，尤其三年前睇住振朗有份提名獎項，到今年見證佢攞獎，好戥佢開心，嗰時同佢拍完《堅離地》再一齊拍《包青天》，佢努力操fit自己，我喺《包》入面都要打，但嗰時仲係肥仔，飛來飛去都好累！」問阿東最近可有被要求變回肥仔拍劇？他笑言︰「減得咁辛苦，要谷返肥，要睇係咪值得犧牲，減肥係為健康，減完又谷肥其實唔健康。」

重演舞劇更輕鬆

何遠東透露暫時還是等開工，希望新年後有好消息。（IG圖片）

　　此外，阿東透露今年八月將會參與香港舞蹈團的演出，他說今次是重演︰「日前同劇團見面，第一件事就係話我嘅衫要重造，因為上次演出嘅時候仲係肥仔，依家啲衫都唔啱着啦。」他表示不擔心因身形改變而銜接不到角色，由於要跳舞，目前的身形跳起來就輕鬆得多。

轉載自: 晴報

etnet榮獲HKEX Awards 2023 「最佳表現證券數據供應商」大獎► 了解詳情