【晴報專訊】鄭中基（Ronald）早前為主演的ViuTV電視劇《暖男爸爸》獻唱主題曲《My Only One》，本月初有份角逐叱咤「我最喜愛的歌曲」大獎，但他最終成為姜濤的手下敗將。事後有不少網民替Ronald不值，Ronald昨日在活動上反而安慰網民，表示年輕一代才是樂壇主人翁。

鄭中基計劃三、四月推出一張新歌加精選唱片。

　　鄭中基與強尼早前為保險公司拍攝宣傳片，昨日齊齊出席記者會。強尼在活動上提議Ronald趁疫情下造人，事後Ronald表示不會刻意，更大爆自己現時處境「嚴峻」︰「因為屋企兩個小朋友太耐無返學，個心散晒，大女星期四開始返學考試，老婆讀緊兒童心理學，又係星期四考試，所以我陣間返去要陪個女溫書。」原來強尼兒子跟Ronald女兒同齡，兩位小朋友同時沉迷網上遊戲，更不約而同被偷了遊戲裝備及帳號，Ronald搞笑說︰「個女第一次被偷裝備，喊到好淒涼，慘到我以為發生咩事。」

自嘲去頒獎禮無人啱傾

姜濤早前揮低一眾前輩，勇奪叱咤「我最喜愛的歌曲」獎。

　　提到本月初缺席叱咤樂壇頒獎禮，Ronald解釋：「依家嘅樂壇都係屬於後生仔，畀多啲鼓勵佢哋，加上我去到真係無一個（歌手）識，都唔係同我同年紀嘅歌手。（莫文蔚有去？）我睇直播先知佢有去，去到都無人同我傾偈，我最鍾意傾偈㗎嘛！」

　　談到網民認為Ronald奪「我最喜愛的歌曲」比姜濤更合理，Ronald說︰「唔會，人哋努力咗咁耐，又出唱片，我只係出咗一首歌，唔可以因為一隻歌就抹殺咗人哋嘅努力，只不過大家好耐無見我，先覺得應該畀獎我，但我連碟都未有。」

轉載自: 晴報

etnet榮獲HKEX Awards 2023 「最佳表現證券數據供應商」大獎► 了解詳情