選舉進入最後直路，下周日（26日）就係1194位選委投票嘅大日子，三個候選人都先後出席咗大大小小嘅選委論壇以至傳媒嘅選舉論壇，面向全港市民。

　　本周二（14日）嘅傳媒論壇，撇除胡官無甚表現、甚至應該畀負分之下唔多講之外，曾俊華同林鄭月娥，邊個贏邊個輸，其實無一個定案，好睇你本身係咩身份。單純用市民身份，當然係曾俊華完勝：玩盡論壇規例，亦都成功散播到佢想帶出去嘅訊息，包括由CY2.0去到撕裂2.0，亦都食住林鄭失策講錯說話向佢進攻。但如果用選委（清楚啲應該係建制選委）嘅角度，林鄭就贏得漂亮：政策討論清晰得多，更畀人一種熟透政府細緻運作，將政府交托畀佢係會更有安全感嘅感覺。

　　論壇完咗之後，曾俊華民望進一步上升，同林鄭差距繼續擴大；不過Tina都多次重申，今次選舉唔係直選，曾俊華以全民直選嘅規格去打呢場選戰，根本就係放錯重點。近排佢重放錯多一個重點，就係「習握手」。

　　2015年國家主席習近平喺北京出席亞投行成立儀式，入場時主動同時任財政司司長嘅曾俊華握手，被稱為「習握手」，當時已經有人話咁係習大大對佢嘅祝福，亦導致佢今次上馬出選。臨近投票佢接受訪問時又再舊事重提，話係習大大對佢非常大嘅鼓勵，似乎想向建制選委發出訊息，就係佢都係有被祝福過。

　　但Tina同接近北邊嘅人士討論過，佢地明言，2015年嘅握手，絕無可能係代表2017年特首選舉嘅一個祝福。「唔好話揀曾俊華，當時連勸退CY唔好連任嘅念頭都未有，點可能係習大大嘅意思呢?」而當日嘅握手，呢位人士就話，只不過係習大大想喺呢個國際場合捧一捧香港，等香港可以喺亞投行有一個更吃重嘅角色，因為香港只係中國一個特區，如果想亞投行有更多事務放喺香港搞，習大大都要做啲功夫先可以令其他參與國信服。一次「極具份量」嘅握手，其實只不過係一個超美麗嘅誤會。

　　不過建制選委就一啲誤會似乎都唔會有，據聞林鄭盤口繼續飆升，有人更已經開到林鄭800票贏出。睇嚟誤會完，終歸都要面對現實。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新節目《說說心理話》青少年不可以戀愛！？真實個案講述驚心動魄經歷► 即睇