一年容易又放榜！今年DSE放榜日就訂咗喺今個星期三（11日），相信一班應屆考生呢排都係食唔安、瞓唔落喇！不過大家唔使驚，司局長喺大廳！事關噚日政務司司長張建宗就已經喺網誌到鼓勵大家「抱積極樂觀的態度」去面對放榜；而今日教育局局長楊潤雄都專登拍咗條片，借踢波同大家講社會係好需要多元化嘅人才，所以有好多多元化嘅路畀大家揀喎！

 楊局長就話：只要大家同心合力，就能夠為香港打出一場精彩的球賽！

做「職人」出路分分鐘好過「U Grad」

　　Jenny見到司長嗰篇成千五字嘅網誌，除咗鼓勵大家樂觀啲之外，仲列出咗唔少唔同課程嘅簡介，真係唔講仲以為係某學院嘅招生單張呀！不過Jenny都好認同司長所講，雖然唔少家長、同學都覺得「職專教育略遜於傳統學術教育」，但都係誤解嚟！其實讀書又好、就業又好，最緊要都係搵啱自己嘅方向，按個人興趣、志向和能力，積極裝備自己！而且唔少職專出嚟嘅人，好多都有一技之長，出路分分鐘好過大學畢業㗎！

楊潤雄拍片撐考生 洗上屆「唔得掂」頹風

　　而楊局長就棄用以往政府用開嘅網誌形式，改為拍片擺上Facebook同大家打氣，唔知係因為老細林鄭下旨，定係楊局長都已經同老細一樣「戀上」Facebook呢？嗱！Jenny就記得上年林鄭一上場，唔知係唔係為咗一洗上屆「唔得掂」局長嘅頹風，即刻叫啱啱升職嘅楊潤雄親自落學校同考生打打氣，唔知佢今年又會唔會叫楊局長落多次場呢？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新節目《說說心理話》青少年不可以戀愛！？真實個案講述驚心動魄經歷► 即睇