猴年開工 預早計劃好輕鬆

　　我知係早Ｄ。啱啱先步入羊年9月，咁快就講猴年開工？之所以如此Fast forward，係因為朋友們要決定春節後何時開工，有Ｄ要安排業務、有Ｄ要安排放假，對於好多人嚟講，去玩大過天，預早計劃先！

 

　　擇日的痛苦之處，是要在不完美的情況下去追求完美，至少是吉祥啦！

 

 

　　順序而言：

 

　　年初一（新曆二月八日，星期一）：許多零售業的朋友都想年初一開舖，因為中環的租金動輒數百萬，分分秒秒都係錢。但今年真係不能權宜，因為初一係破日，庚申日與正月戊寅月嘅地支沖到正，諸事不宜，何況開工！屬虎及猴者尤其搏唔過。

 

　　我在專欄曾提及破日攪Event的慘況：法國品牌大老闆話你之破定唔破，佢只係嗰日先得閒！當日果如所料霧鎖香江（唔好日通常唔好天氣），結果要把戶外慶典改為室內活動，搬了幾噸設備、打了幾百電話，裙拉褲甩，自有閃失！我在的士遺下手袋，失掉了心愛的翡翠戒指。所以奉勸各位，破日衰硬！

 

　　年初二、三：通勝上雖云宜祭祀祈福，但據八字高人推算，猴年立春的八字用神為火、喜神為木。初二為辛酉日，一柱是金；初二為壬戌，是水土，所以兩日都不宜開工。

 

　　年初四（新曆二月十一日，星期四）：政府規定農曆假期後第一個工作天，估計最多人上班。但是日為癸亥日，一柱是水，照理唔啱駛，但高人說該日的地支（亥）與月的地支（寅）合，即寅亥合木，以木生火，亥水又可化申金，解了月的地支（寅）與年的地支（申）的沖尅，所以勉強都算啦！二等用得啦！雖然地支木旺OK，但稍嫌天干是水，與年的天干丙又沖，所以一定要年初四開工的話，最好只做內部準備功夫，對外籌謀留待翌日做啦！肖蛇不可用，因巳亥沖。

 

　　年初五：好彩都有一日用得──甲子日，上木下水，以水生木，雖然不如以木生火好，但日子嘅天干地支係咁排，無價講！不過馬仔唔用得。

 

　　雖不理想，但若不用初五，便要等到初十五（甲戌日）或初十七（丙子日），除非你做廠，否則如何等得？

 

　　睇來睇去，都只有初四初五勉強可用，唯有用吉時補補飛啦！不過，今期唔寫住，因為咁早，驚你唔記得。比較近猴年時，我會將還神、謝灶、大掃除、年夜飯、開工、開年等吉日吉時像新年全盒咁一齊奉上。

 

　　預祝明年好景、日日咁醒！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》講述被情緒困擾真實個案，情緒病最終如何走出低谷？► 即睇