愛妻變成「害」妻

　　猴年伊始，她的新年願望是：

 

　　「我要：纖瘦如馬騮，輕身隨山走。」

 

　　雖然她家附近有山有水，但以她似個波的身材，隨山碌似乎近磅啲。

 

　　其實無論那年是何生肖，每歲她都立下類似宏誓，可惜自從她嫁了之後，這宏願便屢遭挑戰。

 

 

　　她認為問題關鍵，在那兼暖男與煮男於一身的丈夫！

 

　　「老婆！辣椒鴨嚟咧！」煮男捧上自己那香噴噴、熱騰騰的傑作說。

 

　　「唔食！我減肥。」她努力忍住，其實一見辣椒，已經兩眼發光。

 

　　「食少少啦，唔會肥架。」

 

　　「真係唔會肥？」

 

　　「食D啦！大家一齊食先開心嘛。」

 

　　「又好……我陪你食咋！」

 

　　跟住他回廚房弄點東西，出來時，鴨已剩骨！

 

　　「嘩！你食得真係又快又乾淨！」

 

　　「嘻嘻！老公，太好食喇，冇留番啲畀你(口添)。」

 

　　「唔緊要，我去煮過。」

 

　　自此一幕，一向慢如蝸牛的他，食速明顯升了呢，而愛妻的腰圍則升呢得更快。

 

　　「老公，我又向橫發展咧！」她一天對住豐富的晚餐說。

 

　　「最緊要你食得開心。」

 

　　「肥喎！」

 

　　「肥少少啫。」

 

　　「如果我好似你阿媽咁肥呢？」

 

　　「我一樣錫你。」

 

　　「唉！現在都已經變咗隻豬，你都唔想帶我出街啦！」

 

　　「係靚豬，冇問題。我行街一定會分分秒秒拖住你。」

 

　　「你抱住我行街啦！」

 

　　「點解呢？」

 

　　「要向全世界證明你唔介意我肥，而且寶貝我。」

 

　　「老婆！重少少噃！」

 

　　　「都係你啦！攪到我咁肥，成日引誘我食！」

 

　　「老婆，大家都食紅燒豬手，食完我去跑步，做運動，你就趴係梳化上煲劇……。」

 

　　如此，老公愈食愈fit，要肌肉有肌肉、要線條有線條。她則要贅肉有贅肉，要曲線冇曲線，全身已圓潤到渾成一體了！

 

　　這體態的分歧，在相學上也有跡可尋的。

 

　　原來他面方，有紀律，雖然為食，但意志力堅強，懂得馬上補鑊，吃多了、吃膩了，會做運動，二百下掌上壓濕濕碎。沒多久，便可以卸下那多餘的人肉行李。愛妻則面圓，屬玩樂型，一提起玩就格外精神，舉凡一切享受，尤其是口腹之慾，都不能抵擋，意志力容易怠工罷工，所以美食當前，經少少掙扎，便大嚼而後快。

 

　　如果你是面圓圓的，就別買減肥運動器材回家了，因為到頭來，都是堆在屋中變垃圾，而且篤眼篤鼻，成了失控的罪證，應該找專業人士督促，否則容易學猴不成反變豬！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【5月限時優惠】 送價值$288維柏健30天逆轉肌齡(膠原蛋白+生物素) ► 火速行動