真人真事。

 

　　親人歡聚，黃生安排咗歲晚飯局，席間氣氛麻麻地。

 

　　太太黑面，黃生唔明。

 

　　姨仔趁黃太去咗洗手間，對黃生講：

 

　　「唉吔，你今日做乜唔叫雞啫？」

 

　　「轉下口味，叫咗乳鴿嘛。」

 

　　「你明知老婆無雞不歡，快D補飛啦。」

 

　　「哦。」

 

　　「你記住呀！以後團年，記得叫雞呀！」姨仔再提醒佢。

 

　　「其實我一年三百六十四日都叫雞啦，淨係團年先唔叫啫。」

 

　　隔離枱只聽到最後兩句，議論紛紛。

 

　　「呢家乜嘢人嚟㗎，鼓勵人去嫖嘅！」亞婆講。

 

　　「橫掂係老婆發爛渣，唔叫雞可以叫鴨吖。」亞孫一面在手機睇鴨片一面答。

 

***       ***       ***

 

　　娛樂界人士說的真事。

 

　　霍英東一次贊助完足球賽，在酒樓宴請來助慶的歌星。

 

　　當時當紅嘅時代曲歌星奚秀蘭突然轉身向男侍應講：

 

　　「請問有冇衛生巾？」

 

　　「對唔住，我地酒樓冇供應喎！」

 

　　原來奚小姐廣東話唔正，因為見匙羹上有D污漬，想換一隻衛生D嘅調羹。

 

***       ***       ***

 

 

　　以下係稍經藝術加工嘅真事。

 

　　身材豐滿、兩眼含春的女星想改變下形象，於是趁新春去醫院探望長者，希望由G奶之星變為慈善之星。由於病人老到冇牙，所以甚麼糕餅曲奇都唔啱，只可以飲流質，於是佢就買咗鮮奶。

 

　　到咗醫院，佢以最溫柔嘅聲線同老人家打招呼：

 

　　「亞伯，你飲咗我兩包奶吖！」

 

　　亞伯登時兩眼發光，不過兩膝發軟，答：

 

　　「唔好講笑啦！我邊有力呀？」

 

　　「唔緊要，我餵你。」佢俯身同床上亞伯講。

 

　　亞伯登時心臟病發，要急Call醫生。

 

***       ***       ***

 

　　新春笑一笑，雞年開運了。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇