母親節剛過，相信當日一定係母親威水、父親磅水咧！

 

　　媽媽除咗哺育我哋嘅身體同心靈之外，原來仲有策略性貢獻嘅。

 

 

　　有一位家婆，本來日日游乾水，忽然改咗去游濕水，原來佢係為咗救個仔。

 

　　事情係咁嘅：

 

　　佢有個非常執著嘅新抱，每次家嫂同個仔嗌交，必然問：「如果我同你阿媽一齊跌咗落水，你會救邊個先吖？」

 

　　家婆為咗拯救個仔，就去學游水咧。

 

　　過咗無幾耐，兩口子又開片，家嫂照例問無法作答嘅問題，個仔今次醒咧，答：「我唔使落水，阿媽會救你，因為佢可以閒閒地游十個塘。」

 

　　點知家嫂好刁鑽，堅持問：「唔得，你一定要落水！」

 

　　老公好得戚咁答：「咁你死梗咧！嗱！我唔識游水，阿媽肯定救我先！」

 

　　嘿！呢條為難咗全世界男人嘅問題，竟然畀一個水著奶奶攪掂！

 

　　天下母親，為咗仔女，真係不惜代價，但係仔女係咪會回饋呢？

 

　　如果女人嘅人中有破，例如有橫紋、破損、或者癦痣，同仔女嘅關係肯定有麻煩，一係吵大鑊，一係關係疏離，有時唔一定係任何一方做得唔好、或者仔女反骨，總之媽媽人中立兩代關係，有破有癦，必然有拗撬！例如祥嫂就係一例。

 

　　至於正面教材，外相上，最好下庭飽滿、耳有垂珠，表示晚年有子女陪伴，仲有金錢供養。內相上，比較隱蔽，大家可能無留意，有D阿媽背上頸下那部分隆起，有D靚太向我投訴，話著衫唔好睇，要去美容院剷平佢，我話你千祈唔好郁佢！真係千金難買「豬頸肉」（講笑啫），此乃後福所在，表示母慈子孝，唔只貼心，仲可能貼金，總之好嘢啦！

 

　　不過D阿媽都要識做嘅，學游水啦！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情