好意先生去年就說今年特別多人PK。

 

　　前一陣子一位健美先生因為在中環攞景，失足跌斃。我看了新聞後格外驚心。

 

　　好意先生的理據是：今年丁酉年，丁字單腳企，唔穩陣，所以容易跌傷、仆親……等。

 

　　那麼酉字夠四平八穩啦！點知酉字加水邊成酒，有人醉後跌卧在馬路上，被車輛輾斃。

 

　　當然唔係單單都攞命。Yours Truly就執番一身彩！

 

 

　　話說一個早晨，我在天后看見一間新潮水果店，店還未開，閘門外放滿了送貨來的水果，隔著膠套也可以看到嬌紅嫰綠、深紫鮮黃，真是目迷五色。我感到秋天的繽紛與果香。

 

　　突然不知發生了甚麼，我已經趴在地上，攬住條柱，也幸好有條柱阻住，否則可能飛出馬路，與醉漢一同命運，提早報到。

 

　　旁邊一個肥仔明顯被嚇親。

 

　　佢幫我執番個手袋，關心地問：

 

　　「小姐，你冇事嗎？」

 

　　眼神則說：「你想做陸地飛魚咩？」

 

　　我尷尬地指住磚地說：

 

　　「我踢到舊磚！」

 

　　他說：「呢舊磚真危險！」

 

　　眼神卻說：「梗係踢到舊磚啦，唔通踢到舊金咩！」

 

　　我急急閃，看看傷勢，右膝及左肘好似唔見咗兩塊肉，流緊血，附近則藍藍腫腫。我如期赴會時，朋友紛紛發表意見：

 

　　「成日碌出街，你睇！要還咧，仲唔係要喺屋企踎幾日！」

 

　　「真係色即是空，你對眼貪睇靚顏色、腳就踏空。哈哈哈！」

 

　　「你梗係唔夠休息，腎氣不足……（下刪一百字）。」

 

　　好在我唔係男人，否則會好自卑！

 

　　為了深索我是否真的腎虛，又防止更多腎虛的傻人再受磚頭戲弄，我重返「案發」現場，找到水果店負責人。展示了傷痕後，請她通知政府修路。她淡定地說：

 

　　「呢度有N咁多人仆親，我已經搵過路政署，佢地唔理我。」

 

　　眼神說：「你咪傷得輕囉！」

 

　　各位，今年還有好幾個月，你要格外小心行路，唔好做下一站天后—飛魚！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情