加入最愛專欄  收藏文章 

2018-05-03

辨別社交活躍型 有助請人冧客

  正在旺角極速吃快餐。

 

  有人搭訕。

 

  「你一個人食呀?」

 

  「係呀。」我答。你都睇到我隔離冇人啦!

 

  「點解唔約朋友呀?」

 

  「哦…有事要辦,速戰速決。」

 

  「你住附近?」

 

  「唔係,住港島。」

 

  「我喺港島都有層樓㗎,不過後來賣咗,即刻買番兩層。」

 

  「有投資眼光喎!」

 

  「我最喜歡投資同旅行,除咗環遊世界,周末就遊港九新界。有一次入去屯門玩,嘿!點知買咗層樓,因為覺得平嘛!現在升咗一倍。」

 

  眼前人並非有腦俊男,亦非有米亞伯,而是七旬亞姆。

 

  「你唔好咁坦白啦,周圍話畀人聽有好多層樓,小心畀人老笠呀!」我一片好心。

 

  「我有話有好多層樓咩?你點知真定假?」佢眼神閃過一絲狡黠。

 

  睇佢個相咁厚,唔駛問坐擁不少物業啦。而且眼仔碌碌,好明顯未痴呆,亦唔似有妄想症。

 

  佢跟住仲講咗一堆收租婆經驗,原來都幾好蹺。

 

  「你真叻!」我由衷點讚。

 

  「人最緊要叻,而且要愈嚟愈叻!」她臨別贈言。

 

 

  這位力爭上游的耆英,完全有勇於打開話題匣子嘅特徵:

 

(一)眼神有力,說話時一直與你保持eye contact。

 

(二)咀大,代表性格外向,健談。但若唇太厚、太薄,或輪廓模糊,說話都不甚得體。

 

(三)聲線不錯,冇拆冇沙冇破。吐字清晰,思路靈巧。

 

  反之,根據經驗所得,社交恐懼型的人,一般有以下特徵:

 

(一)避免眼神接觸,眼神迷惘或憂鬱,有時兩者兼具。

 

(二)咀小,喻示性格內向,恐懼新事物、新人物、新局面嘅挑戰,對突如其來的人與事會措手不及。

 

  你日常留意呢D特徵,可以訓練自己分辨出對方係社交恐懼型還是社交活躍型,呢種觀察愈趨敏銳,有助你請人或冧客,增加勝算,當然,揀拍拖對象,亦可應用,在公在私,都宜熟知。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新消閒節目《周一加油站》,幫你踢走悶氣,重新注入元氣! ► 即睇

更多玄來更精彩文章
你可能感興趣
#面相 #玄學 #社交恐懼 #社交活躍
編輯推介
即時報價
全文搜索
Search
最近搜看
索羅斯抄底
跨境理財通
More
Share