加入最愛專欄  收藏文章 

2017-08-17

由空櫈引發起的一場辦公室之戰

  正所謂「千金難買東南樓,公司最差就係坐路口」。阿姐Cindy喺公司嘅座位靠近窗口,坐擁維港景色之餘,亦自成一角,堪稱公司嘅「最佳位置」。

 

  由於公司不斷擴張,office有好多座位都變成hot desk。唔係成日喺office嘅同事就要早幾日book定座位。但當然,喺公司有返咁上下地位嘅阿哥阿姐,佢哋當然有自己嘅專屬座位,Cindy就係其中之一。

 

  上星期二, Cindy一早返到公司,當佢一坐低,就好大聲同對面位嘅好姊妹Helen講:「邊個坐過我個位呀?」

 

  Helen回應:「咁犀利嘅,你噚日無返工喎,咁你都知?」

 

  「個seat位矮咗,arm rest又唔啱位。啊,咁即係有其他人坐過我個位啦。邊個?」Cindy鍥而不捨咁繼續追問。

 

 

  Helen畀Cindy迫到埋牆角,唯有答佢:「新嚟嗰個Suki。佢話佢噚日唔記得book hot desk,見你個位無人,先行埋嚟問,坐下你個位得唔得。佢坐之前都有問過我先嘅。」Helen嘗試淡化事件。

 

  Cindy無再出聲,自己靜靜地調教返張櫈,再用消毒濕紙巾抹過arm rest,然後開始做嘢。

 

  暴風雨前夕多數係最平靜,無聲狗先最會咬死人。同日lunch time,Cindy已經同HR大阿姐”casually”反映咗呢件事。

 

  HR收到Cindy阿姐嘅指示,當然要做嘢。同日下午,HR已經叫咗Suki入房傾下偈。

 

  「吓?一張空櫈放喺公司唔係畀人坐,咁用嚟做咩?咁不如叫同事每日放工鎖起自己張櫈啦。」Suki據理力爭嘅回應令HR都O晒咀。

 

  最終呢段HR同Suki嘅「激情對話」somehow流傳咗出嚟,成為一眾同事喺lunch time茶餘飯後嘅話題。

 

  雖然Cindy同Suki由此至終都無就呢件事有過直接對話,但旁人觀察佢哋兩個嘅關係,就好似鬧完一場交咁。辦公室瑣事何其多:叮飯先後次序、掉垃圾方式、如何正確使用洗手盤等,都可以係爭拗嘅源頭。他朝一日,你不幸成為故事入面嘅主角,請記得「一隻手掌拍唔響」,亦請同時好好提防好想喺旁邊「食花生」嘅同事。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

更多我做Marketing文章
你可能感興趣
#上班族 #職場
編輯推介
即時報價
全文搜索
Search
最近搜看
中概股回歸
大國博弈
More
Share