加入最愛專欄  收藏文章 

2021-05-13

畢業第一份工入大公司比細公司有前途?未必!別貪「名牌卡片」或「人去我去」!

  畢業後就能夠入到大公司工作,係所有畢業生嘅夢想。人工高、褔利好,而且相對地穏定,就算唔做到退休,做幾年後再轉工,對CV嚟講都叫「靚仔」。見過有職場初哥為求國企一職,而放棄多份中小企嘅offer,令自己失業半年。但其實第一份工進入大公司工作係咪一個必要?

 

  唔同地方嘅工作環境、文化、傳統都唔一樣。以韓國為例,畢業後第一份工對大學生十分重要,如果唔能夠進入大公司工作,不少畢業生會選擇重讀,希望以更好成績再一次投考國企公司。另一方面,韓國打工仔工作時數長、升職機會少,平均3至5年先有一次晉升機會,加上職場上階級觀念甚重,升職更係難上加難。面對眾多工作壓力下,第一份工對佢哋十分重要,直接決定長遠職場生涯嘅命運。對比香港,雖然香港工作壓力不比其他地方少,但香港人較靈活變通,創業成功率相對較高,所以第一份工能唔能夠進入大公司,唔一定影響你職場生涯嘅全部。

 

  其實不論係畢業後搵工,還是係工作數年後想轉工,到大公司定細公司工作,都好視乎於唔同階段嘅需要。畢業後如何選擇第一份工,取決於呢份工如何幫你長線職場上打好基礎。大公司有完善制度,人工亦高,但喺其制度保護下,工作分配會較細,相對地職場初哥嘅學習機會亦有所局限。加上喺大公司工作,「工作」通常只佔一半時間,而其他時間則處理甚多職場文化嘅事情。學習處理職場問題固然重要,但並非畢業後首要技能,做一個工作能力/知識都較全面嘅小薯,長線發展會更好。相反如果第一份工太著重學習職場文化,長遠就好有機會變成「講就天下無敵,做就無能為力」嘅中/高層。所以喺職場生涯初期有中小企工作經驗嘅打工仔,工作能相對地較為全面,較懂得全方位處理問題。

 

  當然大公司、細公司並冇一個標準答案,亦唔係鼓勵大家唔好去大公司工作。唔同人有自己需要,有人工作數年,只係為咗了解行情後辭職創業,亦有人只係想簡簡單單工作到退休。但其實搵工除咗要諗當前嘅呢一份工外,更要諗該工作會唔會幫助到下一份、下下一份工作。所以要緊記,千萬唔好為咗一張「名牌卡片」,或「人去我去」嘅心態而影響自己長線發展。重點係要清楚自己不同階段所定下嘅長線目標,作最切合自己初心嘅決定。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新消閒節目《周一加油站》,幫你踢走悶氣,重新注入元氣! ► 即睇

更多我做Marketing文章
你可能感興趣
#打工仔 #中小企 #大公司 #第一份工 #畢業生 #辦公室貼士 #職場新鮮人 #職場
編輯推介
即時報價
全文搜索
Search
最近搜看
大國博弈
跨境理財通
More
Share