加入最愛專欄  收藏文章 

2018-05-14Text: Yan Law

【職場歧視】母乳媽媽遭白眼!工作家庭不可兼得?

  母親節啱啱過咗,唔知大家係點樣同媽媽慶祝呢?送禮物?請食飯?定係攬住糸媽聲「我愛你」?計小編話,無論做乜都好,只要表達到自己對媽媽嘅感謝同祝福,就perfect啦!但唔知大家有冇諗過,當我哋不斷歌頌媽媽嘅偉大無私、話要對媽媽好嘅時候,其實喺我哋日日都身處嘅職場裏面,有唔少啱啱生完bb冇耐嘅新媽媽都面對住歧視!

 

  雖然政府近年好積極提倡母乳餵哺,又鼓勵唔少私營機構實施「母乳餵哺友善工作間」,不過現實同理想始終有一段距離。原來有好多堅持以母乳育嬰嘅新媽媽都係公司遭受到唔公平嘅對待,被同事取笑或投以奇怪目光……

 

 

  香港母乳育嬰協會今年四月喺屯門區進行問卷調查,訪問咗大約二百位十八歲以上女士,結果發現,有九成四人贊成或非常贊成母乳育嬰,不過壞消息係,有八成二人曾經得悉或見過以母乳育嬰嘅母親遭受各種形式嘅歧視!

 

  而一直致力推廣母乳嘅非牟利團體「媽媽牌同盟」亦於四月進行網上問卷調查,佢哋喺收返嚟嘅二百八十份問卷入面,發現只有四成受訪者表示公司有提供母乳友善措施,而其餘大部分都係採取「接納工作時間離開去擠乳」、「不干預同事共用雪櫃儲奶」等不干預措施,而唔係衞生署建議嘅「主動安排」!

 

  聽完呢個消息,係咪更加覺得做人阿媽甚艱難呢,尤其係嗰啲啱啱放完產假就要返公司做嘢嘅在職媽媽,話佢哋係超人一啲都唔誇張!所以,如果你身邊咁啱有一位「超人媽媽」,記得要畀多啲關心同體諒佢哋,唔好因為母親節過咗,就忘記咗要多多關顧身邊嘅媽媽呀!

 

(香港母乳育嬰協會Facebook)

 

全新節目《說說心理話》原生家庭對成長有咩影響?改善溝通有計可施?► 即睇

更多小薯茶水間文章
你可能感興趣
#職場 #上班族 #在職媽媽 #母乳餵哺 #友善工作間 #母親節
編輯推介
即時報價
全文搜索
Search
最近搜看
雙幣交易
大國博弈
More
Share