加入最愛專欄  收藏文章 

2020-08-31

《經濟不停學》一隻股份抵唔抵?唔係齋睇市盈率!

  成日聽啲股佬講,邊隻股份抵買,邊隻股份要追落後。咁,點樣睇隻股抵唔抵呢?普遍可以睇兩個指標,就係市盈率同市帳率啦!前者用嚟計回本期,後者用嚟睇用現價買到嘅帳面價值有幾多,不過唔同股份所適用嘅指標都有唔同,一齊嚟解構吓啦!

 

(Shutterstock圖片)



市盈率計回本期,數字記得與同行比較

 

(Shutterstock圖片)



  市盈率即係(PE),係最基本用嚟衡量股票平貴嘅指標。計算方法係股價除以每股盈利,以中國旺旺(00151)喺8月24號早市嘅收市價5﹒47元為例,上年公布嘅每股盈利係29﹒38仙,市盈率就等於18﹒62倍,亦即係如果大家喺5﹒47銀呢個價位買入,假設每年嘅每股盈利不變,要用超過18年半先可以番本。


  不過,單睇市盈率幾多倍,係唔可以得出呢隻股份抵唔抵買嘅結果,凡事要講比較,投資者可以用番旺旺嘅市盈率同同業嚟比,例如康師傅(00322)同統一(00200)咁,佢哋嘅市盈率分別係20﹒43倍同21﹒13倍,照咁睇,旺旺就最抵啦。


  睇PE其實係最基本衡量一隻股份抵唔抵埋,適合長線投資者,不過唔可以一本通書睇到老,唔同行業都要用唔同嘅衡量準則,好似股王騰訊(00700)嘅PE去到50幾倍,唔通買咗要等50年回本?好似科技股咁就唔適合用PE衡量啦!另外,亦都要留意PE有分往績市盈率和預期市盈率。

資產總值決定市帳率,銀行、地產最緊要疊水!

 

(Shutterstock圖片)



  至於市帳率(PB)就比較啱用喺衡量銀行同房地產呢類重資產企業,因為佢嘅計算方法係股價除以每股帳面淨值,每股帳面淨值即係資產總值減負債同埋無形資產,再除以發行股數。資產可以係現金、物業同土地等等,因為銀行好依賴我哋嘅存款創造收入,而地產公司當然就靠物業啦!所以每股賬面價值係可以反映到佢哋嘅賺錢能力。


  當市帳率愈低,代表股份愈平,如果得出個數細過1,代表股價低過公司帳面值,有折讓喺度,如果大過1,即係股價存在溢價。例如內銀建行(00939)市帳率係0﹒585倍,即係股價對比資產有41﹒5巴仙折讓。


  另外,都要同同一行業嘅公司比較,例如中信銀行(00998)同中行(03988)嘅市帳率分別係0﹒288倍同0﹒372倍,喺呢個時候中信銀行就抵啲。


  
PE、PB都唔夠?EBITDA衡量公司搵錢能力!

 


(Shutterstock圖片)
  

  有時候,有部分資本密集行業,齋睇PE、PB都未必夠,係會計概念上可能涉及折舊、稅項支出等,呢個時候就要睇EBITDA啦!即係「除利息、稅項、折舊及攤銷前盈利」,睇EBITDA嘅數字可以比較貼近公司現金流,反映公司搵錢能力。


  例如濠賭股咁,全盛時期真係日日數銀紙咁!但因為賭場涉及好多資金借出借入,加上賭場、酒店本身物業都有一定折舊率,而會計上利息同折舊係當「支出」,如果齋睇純利就未必知道公司確實搵錢能力,所以睇剔除利息、折舊嘅EBITDA就會清楚搵錢情況啦!

 

撰文:吳藹林

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經.生活App 精明外匯買賣三招「睇圖-比較匯率-預設提示」iOS / Android / Huawei

更多經濟不停學文章
你可能感興趣
#理財 #Pe #PB #EBITDA #市盈率 #市帳率 #股市 #港股 #恒指 #經濟不停學
編輯推介
即時報價
全文搜索
Search
最近搜看
大國博弈
美國大選2020
More
Share