加入最愛專欄  收藏文章 

2020-11-18

《經濟不停學》小學雞學堂:陰陽燭要點睇?

   睇電視成日見到啲財經主播同股佬對住張又紅又綠嘅陰陽燭圖口噏噏,望下就知嚟緊個價會點行,個樣好似好專業,但新手要學陰陽燭又點入手好呢?今日我哋小學雞教室,一文教識你點睇陰陽燭!

 

 (Shutterstock圖片)

 

陰陽燭有手腳,各部分代表唔同信息!

 

 (圖一)

 

  陰陽燭係用嚟顯示一個時段(一分鐘、一日、一星期甚至250日都可以)嘅價格或指數區間入面嘅走勢,而佢哋嘅唔同形態,處於唔同位置,係會對股份或者指數咁,有預示作用。有人話陰陽燭就好似一本歷史書咁,記載一個朝代嘅興衰,而朝代興衰就梗係有啲特質可以畀人睇到啦!

 

  係時候入正題啦!一條燭分四個部份,分別係最高位、開市價、收市價同最低位,(圖一)我哋通常可以睇到開市價同收市價嘅差距會形成一個長方形,呢個長方形就叫燭身啦!而長方形嘅頂上面有條幼直線,就係叫「手」,手嘅最高點就係個段期間嘅最高價;長方形底嘅直線就叫「腳」,腳嘅最低點就係個段時間嘅最低價。如果當開市價等同全日高位,支燭就會冇咗隻手;同樣地,收市價等同全日低位,支燭就會冇咗隻腳。

 

  至於點樣分「陰燭」、「陽燭」呢?所謂「陰燭」(通常綠色表示),啫係開市價高過收市價,代表個日賣方力度可能比買方稍強;「陽燭」(通常紅色表示)啫係收市價高過開市價,代表買方力度稍強。

 

唔同時段嘅陰陽燭唔同作用

 

 (Shutterstock圖片)

 

  通常我哋睇陰陽燭,係觀察一隻股份嘅過往走勢,從而預測佢嘅未來走勢,最基本我哋可以留意到,通常交投旺盛嘅股份,日線圖陰陽燭都會營造出一個個「浪」,唔少技術分析認為,當一浪高於一浪時,股份或指數嘅低位就明顯,而上傾趨勢亦相當清晰,配合埋成交量同其他技術分析,就可以搵到股份嘅買入位、賣出位以及轉勢位。

 

  通常陰陽燭以日圖為標準,但點解又會有分鐘圖呢?因為分鐘圖係為短炒玩家而設,例如炒期指、牛熊證、窩輪等,真係秒秒鐘幾十萬上落,所以分鐘圖陰陽燭就可以幫到呢班炒家可以更加緊貼咁捕捉大市走勢啦!而半年、一年陰陽燭圖就梗係為長線持有者而設啦。

 

技術分析不可單看,陰陽燭要配合成交量

 

  (Shutterstock圖片)

   咁究竟識睇陰陽燭係咪等於萬能呢?咁就梗係唔係啦!正如之前所講,陰陽燭只係屬於歷史,而技術分析本身係會「滯後效應」,所以係唔可以盡信!而點樣可以確認買入賣出以及轉勢信號呢?最基本係要配合埋成交量、RSI指數、MACD指數等技術分析,幾個指數一齊睇,就可以提高準確率啦!

 

  下一集,我哋會一齊睇睇,陰陽燭嘅唔同形態係代表咩意思,原來唔同嘅組合都可以有唔同解讀!記得留意我哋「經濟不停學」啦!

 

撰文:吳藹林、李皆穎

 

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多經濟不停學文章
你可能感興趣
#理財 #經濟不停學 #小學雞學堂 #小學雞學堂 #陰陽燭 #技術分析
編輯推介
即時報價
全文搜索
Search
最近搜看
雙幣交易
聚焦兩會2024
More
Share