加入最愛專欄  收藏文章 

2020-12-07

《經濟不停學》小學雞學堂2:一文睇清陰陽燭單獨形態

   上個星期同大家簡介咗咩叫陰陽燭,唔同時段嘅陰陽燭圖有咩作用,今次就入戲肉,講下幾種投資者應該要知嘅陰陽燭單獨形態,佢哋啲名真係五花八門咁,又陀螺又星星,我哋可以從辨別佢哋嘅形態,從而幫助我哋預測後市。

 

(Shutterstock圖片)

 

大陽燭/大陰燭

 

 


所謂「
大陽」其實好容易分辨,因為燭身比起之前會長好多,加上有大成交量,意味資金追捧(HV2圖片)

 

  大陽燭或者大陰燭嘅標準形態係「冇手冇腳」,就算有都係好短,「大」係講緊佢哋嘅燭身比一般燭長好多,好似一支長棒仔咁。出現大陽(陰)燭代表利好(淡),假如如股價喺一番爭持後,突然以大陽(陰)燭破(穿)阻力綫或移動平均綫,再加埋成交額增加,利好同利淡嘅訊號會更加強烈啦!

 

十字星(長十字星、蜻蜒十字、垂死十字)

 

 

 

  另外一種常見嘅型態,就係十字星啦!十字星其實反映緊好淡之間嘅角力。最基本嘅十字星,燭身係一條線,形態直情係十字路口咁,可以代表走勢冇乜方向,亦有待變或者轉向嘅意味。

 

  而十字星本身自己有唔同嘅形態,例如長十字星嘅手同腳都比較長,代表指數/價格喺時段內出現好大波幅,當出現喺圖表頂或者底,有機會要轉向;「蜻蜒十字」就係冇手,好似一個T字咁,當個市跌緊嗰時出現喺低位,就有機會反彈,因為佢收市嗰陣炒返上;但如果出現喺高位,就可能會回吐,因為曾經跌過落去。

 

  「垂死十字」則係冇腳,似一個倒轉嘅「T」字,又可以叫「墓碑」,事關如果出現喺高位,利淡訊號明顯,個價位唔夠力keep住咁高,形成一個利淡信號;相反如果低位出現就有機會回穩,因為已經無再跌落去。另外,十字星係可以冇手冇腳,啫係真係得番一條線,不過就冇一個特別嘅名。

 

 

陀螺

 

 

  手同腳差唔多長,燭如其名,好似個陀螺咁;跌過又升過,最後同開市差唔多;意味升勢或跌勢有放緩跡象,未有明確跡象。

 

  但假如陀螺出現係升趨嘅尾部,再配合大成交,反映高位承接力不足,短期內股價或會出現見頂回落情況(反之亦然)。陀螺出現係升跌勢嘅末段先有啟示作用,大家要留意返啦!

 

 

射擊之星/倒轉錘頭/吊頸/錘頭

 

 

  點樣又為之「射擊之星」,其實就係支燭冇腳,或者隻腳好短,唔理燭身幾長,手要比燭身長兩倍或以上。如果出現喺頂,後市有機會向淡。如果出現喺底,會改名做「倒轉錘頭」,個市短期可能見底。

 

  而「吊頸」就同「射擊之星」相反,係冇手或者手好短,腳要長過燭身兩倍或以上。如果出現喺頂,後市有機會向淡,陰燭會加強佢威力。假如出現喺底,就會叫「錘頭」,如果出現喺底,個市短期可能見底,陽燭會加強佢威力。

 

撰文:吳藹林

 


 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全城注視!銀行定存比較神器,助你搵到最佳息率!► 立即了解

更多經濟不停學文章
你可能感興趣
#理財 #經濟不停學 #陰陽燭 #十字星 #陀螺 #射擊之星 #吊頸 #技術分析 #K線
編輯推介
即時報價
全文搜索
Search
最近搜看
雙幣交易
聚焦兩會2024
More
Share