加入最愛專欄  收藏文章 

2021-08-19

《經濟不停學》肥水不流外人田,阿拉伯民族主義興起推動OPEC成立!

   上個月尾簡單介紹過OPEC(石油輸出國組織)嘅運作機制同目的,不過就好少人會深究點解會有一個咁嘅組織出現。其實簡而言之,背後是一段5個中東、拉美產油國同俗稱「七姊妹」嘅西方跨國公司爭奪石油主導權的故事,而更大背景係石油政治同地區問題,包括阿拉伯國家民族主義興起、蘇伊士運河危機,阿以衝突等。 

 

石油需求大爆發,西方國家分餅仔壟斷石油市場

 

《紅線協定》瓜分嘅勢力範圍。(shutterstock圖片)

 

  喺20世紀初,有人發明咗可以將燃料化學能轉化做動能內燃機,第一次世界大戰突顯咗石油用於卡車、坦克同飛機等交通工具喺現代戰役嘅重要性。1916年第一次世界大戰時期,戰敗嘅鄂圖曼帝國三國瓜分。敘利亞安那托利亞南部、伊拉克摩蘇爾地區劃為法國的勢力範圍。敘利亞南部同美索不達米亞南部為英國勢力範圍。黑海東南沿岸、博斯普魯斯海峽達達尼爾海峽兩岸地區為俄羅斯勢力範圍。

 

  後嚟隨汽車成為主要交通工具,全球主要工業國家對石油嘅需求爆發。1928年美、英、法、荷達成《紅線協定》,協議合夥開發位於鄂圖曼帝國範圍內的石油,在當地擁有特許權嘅7間跨國公司稱為「七姊妹」,包括屬美資嘅新澤西標準石油、紐約標準石油、德士古、加利福尼亞標準石油同海灣石油,另外仲有英國波斯石油公司同英荷合資嘅殼牌公司。呢啲公司同產油國本身嘅利潤按「50:50」分配,而為咗防止競爭,佢哋控制石油產量同價格,產油國本身只有好少話事權。

 

依家七姊妹變身成四間公司繼續營業。新澤西標準石油同紐約標準石油合併成埃克森美孚英國波斯石油公司同阿莫科合併,依然叫英國石油;加利福尼亞標準石油同德士古合併為雪佛龍,海灣石油成為雪佛龍嘅一部分。(Facebook 官方專頁圖片)

 

阿拉伯民族主義興起,與西方零碎衝突加劇

 

  第二次世界大戰後,各國政府希望將石油生產國有化。伊朗、印度尼西亞同沙特阿拉伯喺19501960年間都將石油基礎設施部分國有化。阿拉伯民族主義嘅倡導者,埃及第二任總統納賽爾(Gamal Abdel Nasser)就係喺蘇伊士運河危機期間將蘇伊士運河公司私有化,而當時全球近5%石油嘅石油貿易都要通過呢條河進行。

 


蘇伊士運河直到依家,都係原油運輸重要嘅交通樞紐。(shutterstock 圖片)

 

  呢件事鼓勵咗納賽爾繼續推廣阿拉伯民族主義,利用佢不斷增長嘅人氣呼籲阿拉伯國家之間合作、增加民眾政治參與同重新佔用自然資源嘅基礎上進行泛阿拉伯復興。

 

  喺沙特阿拉伯,阿拉伯民族主義、復興黨同共產主義喺東方什葉派同遜尼派社區中傳播,呢啲想法主要嚟自巴林,或者同喺阿拉伯-美國石油公司學校任教嘅敘利亞、黎巴嫩或埃及教授一齊引進。

 

  1958年,阿卜杜勒-卡里姆·卡塞姆(Abd al-Karim Qasim Muhammad Bakr al-Fadhli al-Zubaidi)領導嘅自由軍官組織發動軍事政變,推翻咗長期依附於英帝國主義,費薩爾二世國王嘅政權,建立伊拉克共和國。伊拉克革命後,英國嘅權力重臣寫過封信畀保守派首相哈羅德麥克米倫(Maurice Harold Macmillan),提醒佢完全控制中東石油對英國經濟嚟講係幾咁重要。原來英國透過全球石油貿易,每年可以得到價值2﹒2億英磅嘅石油同一億英磅嘅海外資產,而且唔會對英國貨幣體系造成直接成本。只有由石油、油井再到消費者形成嘅完整產業鏈,英國先有望保留由石油貿易中獲得嘅經濟利益。

 

  另一方面睇,如果產油國領袖成功拎番石油開採權,控制世界上最有價值嘅大宗商品同主要國內收入來源,對於鞏固權力同獲得國內支持會起到好大作用。

 

 

阿卜杜勒-卡里姆·卡塞姆(上圖)發動伊拉克革命,當時美國中情局認為納賽爾係幕後黑手。(wiki圖片)

 

七姐妹擅減油價成導火線,OPEC五創始國決心奪回主導權

 

  俄羅斯喺1950年代後期開始用平價石油創佔市場份額,為咗保持競爭力,七姐妹擅自降低委內瑞拉同阿拉伯石油嘅價格。呢件事引發產油大國不滿,於是1959年第一次阿拉伯國家聯盟石油會議召開,當時伊朗同委內瑞拉受邀做觀察員,會議達成一致,要求七姐妹喺調整油價嗰陣要同產油國傾咗先。但七姐妹冇理到,之後一年再主動調低油價。

 

  一班產油大國真心嬲嬲豬,跟著落嚟嗰一個月,喺沙特阿拉伯嘅塔里基(Abdullah ibn Hamoud Tariki)(後來做咗沙特第一任石油部長)、委內瑞拉礦業部長佩雷斯·阿方佐(Juan Pablo Pérez Alfonzo)同伊拉克總理卡塞姆嘅倡議下,巴格達會議喺19609月召開。嚟自伊朗、伊拉克、科威特、沙特阿拉伯同委內瑞拉嘅政府代表傾點樣提高本國生產嘅原油價格,同埋點樣應對跨國石油公司嘅單方面行動,呢五個國家就喺1961年1月正式宣佈成立OPEC,以確保可以由主要石油公司獲得最優惠嘅價格。

 

1961年,OPEC第一次會議於瑞士日內瓦舉行。(OPEC官網圖片)

 

撰文:吳藹林

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

【搶先申請】免費試用etnet強化版MQ手機串流報價服務! ► 立即行動

更多經濟不停學文章
你可能感興趣
#理財 #經濟不停學 #OPEC #石油輸出國組織 #七姊妹 #民族主義 #蘇伊士運河危機 #阿以衝突 #納賽爾 #阿卜杜勒-卡里姆·卡塞姆 #伊拉克共和國 #俄羅斯 #伊朗 #伊拉克 #科威特 #沙特阿拉伯 #委內瑞拉
編輯推介
即時報價
全文搜索
Search
最近搜看
跨境理財通
施政報告
More
Share