加入最愛專欄  收藏文章 

2020-07-27

《Online有話兒》要搵馬雲可能好難!

   神州呢期真係是非多,同美國水深火熱之際,中印都好緊張,之前嘅邊境衝突互有傷亡;而家呢個火頭慢慢燒到去中資企業,而印度法院更開出傳票畀馬雲,究竟發生乜事呢?

 

(Shutterstock圖片)


 
阿里旗下公司不當解僱,指員工不肯配合散播假消息

 

(Shutterstock圖片)


 
  件事就要從阿里巴巴講起,話說佢哋旗下有間公司叫「UC Web」;UC Web嘅前任副總監Pushpandra Singh Parmar 爆料,話UC會喺印度當地審查一啲不利中國嘅資訊,而公司另一個App「UC News」、「UC Browser」仲會散布疑似虛假消息,其中就包括印巴開戰、中印邊境相關嘅假消息。


 
  呢位員工就因為反對公司散布假消息,而被公司炒魷。呢件事本來只係當「不當解僱」處理,不過當中涉及嘅人同事好似愈來愈多,加上「UC News」遭印度封殺引發裁員,令到中印之間嘅不信任加劇。雖然阿里巴巴話非常關注員工福利,並且會配合當地法規,但點講都無用啦!


 
法院召數十人作證,馬雲都遭到傳喚

 

(Shutterstock圖片)



  正正就係事情相當嚴重,所以印度法院已經傳幾十人作證,其中包括馬雲。而阿里巴巴已經表示,由於案件已經進入司法程序,所以不便作討論。



  牽一髮而動全身,唔知係咪要玩報復,連隔籬微信都波及。據了解,用印度電話註冊嘅微信帳號,呢兩日已經開始登陸唔到,而且彈出個信息話:「根據印度法律,目前無法提供微信服務。」其實東南亞好多人都習慣用微信,突然無得用都幾麻煩下。



  呢件事搞幾耐都真係未知之數,因為印度技術部已經因為資訊安全理由,宣布禁止微博、TikTok等59個同中國有關嘅應用程式,呢啲企業都被視為中國政府嘅戰略工具。



阿里公關:Catch馬雲if you can!

 

(Shutterstock圖片)



  話時話,阿里嘅公關委員會主席王帥,呢幾日喺朋友圈表示,已經確實收到印度方面嘅傳票,而且好風騷咁話:「要搵馬雲可能好難,自從佢退休之後已經愈來愈難搵到佢,可能你要去馬雲自己旗下嘅酒吧搵搵囉!」



  真係Catch Jack Ma if you can啦!

 

撰文:李皆穎

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

現凡訂閱etnet YouTube Channel,即賞麥當勞現金券!
► 立即行動

更多Online有話兒文章
你可能感興趣
#理財 #馬雲 #阿里巴巴 #UC Web
編輯推介
即時報價
全文搜索
Search
最近搜看
監管風暴
跨境理財通
More
Share