加入最愛專欄  收藏文章 

2020-09-10

侵侵獲提名諾貝爾獎?「水門事件」記者爆侵侵刻意淡化疫情

  正所謂「沒有最瘋狂,只有更瘋狂」,侵侵(特朗普)呢幾年幾乎玩轉全個地球,早前以色列同阿聯酋關係正常化,有挪威議員話係侵侵功勞,所以要提名佢競逐2021年諾貝爾和平獎,唔係咁詼諧吓話?

 

(Shutterstock圖片)


挪威議員提名侵侵爭諾貝爾獎

 

(Shutterstock圖片)



  究竟邊個人就去提名侵侵競逐諾貝爾和平獎呢?原來係挪威極右翼的4屆國會議員蒂布林.耶德(Christian Tybring-Gjedde),佢接受傳媒訪問時,第一步梗係利申返自己唔係佢粉絲:


  「但以佢功勞而言,我認為佢確實係各國嘅和平作出努力,甚至比起其他和平獎嘅提名人還要多。」


  佢又強調侵侵喺以色列同阿聯酋關係正常化上扮重要角色,預計其他中東國家都會跟隨阿聯酋步伐;呢位議員又話,侵侵成日都做「世界級和事佬」,包括處理印巴衝突同南北韓問題都出過唔少力。


  不過講開又講,其實侵侵都唔係第一次獲提名,早係2018年時候,侵侵同金仔(金正恩)喺新加坡世紀破冰面會時,呢位挪威議員已經話要提名侵侵競逐呢個獎。



「水門事件」記者大爆侵侵早知疫情,但選擇刻意淡化

 

(Robert Woodward facebook截圖)



  另一邊廂,美國疫情仍然持續,呢壇嘢就梗係畀外界用作攻擊侵侵嘅材料,而因為報道「水門事件」成名嘅《華盛頓郵報》記者伍德沃德(Robert Woodward)就係自己本書《Rage》大爆,其實侵侵2月份已經知道呢次疫情會好大件事,不過選擇隱瞞,並對伍德沃德聲稱「唔想引起公眾恐慌」。


  呢件事傳到去記者手中,就梗係走去問侵侵兩句啦,不過侵侵咁回應:


  「我係呢個國家嘅啦啦隊隊長,因為我熱愛呢個國家,所以唔想大家嚇親同製造恐慌,因此我哋要表現得有信心兼展示力量!」


  佢究竟答緊問題定耍緊太極,就睇你點睇啦!不過如果侵侵早小小喺2月開始預備,或者美國就唔使死咁多人啦!

侵侵無金主要告急:如果有需要我會用自己錢!

 

  侵侵連任之路睇怕都幾辛苦,其實佢都已經承認自己搵唔到金主,當記者問佢會唔會自己拎荷包搞造勢大會,佢答:


  「如果有需要用自己錢,我會用,不論任何代價,我哋必須贏!」


  事實上,早在上屆總統大選時(2016年),侵侵即已自掏6600萬美元「贊助」自己的選戰。


  未來呢一兩日,侵侵都會前往一啲搖擺州份爭取游離票,其中包括密西根州、內華達州等,而且如果想贏埋對手「
Sleepy Joe」(拜登),就一定要贏埋北卡羅來納州同佛羅里達州,場仗有排打啦!

 

撰文: 李皆穎

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經.生活App 精明外匯買賣三招「睇圖-比較匯率-預設提示」iOS / Android / Huawei

更多Online有話兒文章
你可能感興趣
#理財 #侵侵 #特朗普 #諾貝爾獎 #蒂布林.耶德 #蒂布林.耶德 #挪威 #阿聯酋航空 #以色列 #北韓 #水門事件 #Rage #伍德沃德 #Robert Woodward
編輯推介
即時報價
全文搜索
Search
最近搜看
大國博弈
全球放水
More
Share