收藏文章 

2020-10-16

《Online有話兒》旅遊氣泡來了!原來兩地居民都無乜熱情?

  香港政府同新加坡宣布就建立雙邊「航空旅遊氣泡」達成原則性協議,話已經準備緊迎接旅客重臨喎。雖然飛新加坡嘅機票即刻「坐地起價」升咗四成,但香港人呢邊似乎無乜大反應,得啲口痕友講下意味不明嘅「氣泡就係等爆!」同埋話想去日本同台灣多啲囉。不過,唔知新加坡人又點睇呢。

 

入境限制唔清楚 好驚再爆新型肺炎

 

(Unsplash圖片)

 

  如果件事搞得成,新加坡就會係香港第一個達成旅遊氣泡嘅地方,而原來新加坡依家係有同其他國家做緊一啲叫快速通道或者綠色通道嘅安排,不過多數都係同公務或商務旅客有關,一係就淨係單邊入境,唔似同香港咁係雙邊安排。

 

  所以,有啲新加坡網民驚兩個地區嘅人往來後國內再爆新型肺炎呀,雙方政府都淨係講明喺出發前14日內,唔可以去過其他地方,但無講過嚟自其他國家嘅人可唔可以透過轉機方式入境,所以咪驚搞到亂晒又危險囉。當然,都有人針對香港本地疫情,話最近確診開始多番,質疑點解仲要開放。

 

  要玩可以遲啲先,但屋企人唔見,真係會心掛掛。新加坡媒體話公眾都期待可以再嚟香港,但仍然會小心衡量風險。有香港出世啲新加坡人話,農曆新年之後爸爸病咗入醫院,仲有受邀做講師演講,都因為旅遊限制被逼嚟唔到呀,話可能到12月先嚟港大教下書喎。

 

(Facebook截圖)

 

兩地居民原來互相嫌棄!新加坡人:香港已經唔係好似以前

 

  咁耐無飛,梗係要去好玩嘅地方顛下啦,香港人至鐘意返「鄉下」(即係日本),新加坡係無咁啱心水㗎啦。原來,有唔少香港人覺得新加坡環境同香港差唔多,話買嘢、食嘢都分別唔大,而且都一樣要逼地鐵;而新加坡網民睇法都差唔多,話好似去緊同新加坡一樣嘅地方,幾乎相同嘅建築物,生活方式甚至乎係天氣。

 

(Facebook截圖)

 

  亦有人疫情期間過去半年喺香港生活,話雖然周圍都有零售買賣,但同時有好多舖頭拉咗閘,夜晚嘅街道空蕩蕩,香港已經唔係好似以前咁,唔建議嚟呀。

 

  事實上講咗咁多,兩地網民係無直接互片嘅,話新加坡同香港一樣,相信目的都係抱怨下啫,呢個旅遊氣泡實際執行係點都仲未知,到時再講都未遲啦。

 

撰文:吳藹林

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多Online有話兒文章
你可能感興趣
#理財 #旅遊氣泡 #新加坡 #香港 #Online有話兒 #航空旅遊氣泡 #新冠肺炎
編輯推介
即時報價
全文搜索
Search
最近搜看
雙幣交易
聚焦兩會2024
More
Share