收藏文章 

2020-12-17

《Online有話兒》梁孟松辭職?中芯股價跌到慘慘豬有原因!

 

   呢排個市跌到慘慘豬,恰巧遇到單花生料,股票谷人人討論,就係中芯國際(00981)CEO梁孟松請辭,據聞呢單嘢係因為台積電前COO蔣尚義空降做副董事長,兩位聯席CEO梁孟松同趙海軍直接向佢匯報,究竟呢單新聞有咩前世今生呢? 

 

(Shutterstock圖片)

 

梁孟松能力超班,被喻為中國芯片救星

 

 

(Shutterstock圖片)

 

  梁孟松本身係台灣人,而且係成功大學拎到電機工程學碩士,之後再去加州大學柏克萊分校進修,後來加入三星從事有關半導體工作,有指梁孟松參與嘅半導體技術專利就有近200件;1992年返台後,就加入台積電工作,幫台積電拎多5百個發明專利,係2003年更以自主技術擊敗IBM,真係叻叻豬!之後做過一段時間大學教授後再加入三星集團擔任技術部門長。

 

  直到2016年,中芯向梁孟松招手,希望可以透過佢嘅技術,為中國芯片帶來希望,係反覆接觸一年之後,終於係2017年10月16日,中芯國際宣布梁孟松出任公司聯合執行長,有指當時年薪約20萬美金。最後梁孟松真係不負眾望,去年已經令到中芯量產14nm芯片,並開始研發7nm及5nm技術,雖然對比起台積電已經研發3mm技術仲有一段距離,不過都已經將中國芯片拉近國際水平,所以當時被喻為中國「芯片救星」。

 

蔣尚義空降,梁孟松表示:我覺得不被尊重及信任

 

 

梁孟松(中芯國際官網圖片)

 

  梁孟松辭職,對於中國芯片界真係一個震撼彈,昨日(16日)中芯H股上午直接宣布停牌,A股就直接跌停。有一份辭呈係網上流出,內容係梁孟松交代點解要辭職:

 

  「上星期三(9日)早上接獲董事長通知,蔣尚義將出任公司副董事長一職,對此,我感到十分錯愕與不解,因為我事前對此事毫無所悉。我深深地感到已經不再被尊重與不被信任。我覺得,你們應該不再需要我在此繼續為公司的前景打拼奮鬥了。我可以暫時安心地休息片刻。」

 

  呢份文件係真係假就各位讀者自行判斷啦,不過可以肯定嘅係,一個山頭點可以藏兩隻老虎呢?更何況本身梁孟松係中芯做緊阿一,突然被人空降騎住,心入面點都有啲唔舒服,怪就怪公司無同人地先打聲招呼啦。

 

業內人士:兩個人專業不同,應沒有威脅

 

 

(Shutterstock圖片)

 

  呢件事對於業內人士嚟講真係十分不解,因為當年兩個人都係台積電有過合作,而且兩個人合力打敗IBM,發明130nm先進技術。據業內人士指出,梁孟松專業於晶片設計及晶圓代工技術;而蔣尚義則精於先進封裝(Chiplet),即將不同功用的晶片集合於一塊電路板上,令佢符合特定功用,例如人工智能(A.I.)等。

 

  不過市場傳聞,呢次中芯突然搵返蔣尚義返嚟,係因為蔣尚義可以招攬台積電有技術嘅員工,因為自從「武漢弘芯」爛尾後,全中國都只有中芯國際可以接收呢班技術員工。點都好啦,順得哥情就肯定失嫂意,中芯國際股價呢期仲可唔可以企穩,就拭目以待啦!

 

撰文:李皆穎

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

更多Online有話兒文章
你可能感興趣
#理財 #Online有話兒 #中芯 #梁孟松 #蔣尚義 #cpu #芯片 #晶片 #晶圓
編輯推介
即時報價
全文搜索
Search
最近搜看
雙幣交易
財政預算案2024-25
More
Share