科技界成日都有好多單「刁」，唔係壯大自己間公司，就係想透購收購殲滅對手。當年Facebook剛剛做起無耐，雅虎出到10億美金都不為所動，今日邊個跑贏真係有眼睇；另一邊廂，Tesla老闆馬斯克係推特上表示，曾經想搵蘋果傾吓出售Tesla嘅可能性，不過就慘遭庫克食檸檬，哎呀，又走漏眼啦？ 

 

（Shutterstock圖片)

 

馬斯克：蘋果搞電動車？真奇怪

 

 

 

佢係自己個推特上咁講囉（馬斯克推特截圖）

　　事源係因為近期Ark Invest研究總監Brett Winton係推特上面發表有關蘋果研發電動車「Apple Car」嘅最新資訊，不過馬斯克就搲曬頭，因為當時就曾經搵過蘋果傾下出售Tesla嘅可能性：

 

　　「當年研發緊Model 3嘅最黑暗日子，我試過搵蘋果CEO庫克，傾吓出售Tesla嘅可能性，而叫價只有而家市值1/10，不過佢就拒絕見我囉。」

 

　　Model 3可以話係Tesla成名作，2016年推出就拎到50萬張訂單，因為呢款電動車配置多鏡頭同專用GPU，所以可以支援自動無人駕駛，而且重推出埋Tesla網上商店，只要有咩AI新功能，就可以透過商店購買，享受駕駛樂趣。

 

特斯拉股價從200元至2000元的神話

 

（Shutterstock圖片)

 

　　Tesla一直都係股壇神話，如果按照2016年均價計算，當時股價大概係180至220美金浮動，計算未「一拆五」，平均市值係380億美金左右；直到2020年，係疫情下全球車廠都出現純利倒退或者虧損，但Tesla電動車嘅訂單及收入保持正增長，加上英國宣布2030年廢止汽油車，更加推動Tesla股價，從年初股價400美金升到最高見過2318.49美元，增長接近6倍！

 

　　眼見股價咁高，Tesla8月宣布將股份「一拆五」，股價雖然去返４００美金水平，但因為公司推出「Cyber Truck」同埋推高市佔比，短短幾個月股價又漲六成，目前係640美元水平，但市值已經暴增至6069億美元。雖然唔少華爾街大鱷都話股價到頂風險極大，嘗試沽空Tesla，不過年尾埋單計數，呢班「空軍」應該個個都損手爛腳啦！

 

蘋果汽車名為「泰坦計劃」，採用新電池設計

（Shutterstock圖片)

 

　　其實蘋果係2014年已經有計劃搞電動汽車，當時命名為「泰坦計劃」，不過電動汽車呢家嘢比起整手機更複雜，唔係一時三刻推出到，隨後計劃係宣布擱置。直到曾於 Tesla 公司工作嘅 Doug Field係2018 年接手項目，呢個項目先開始有小小起色。

 

　　據了解，蘋果汽車可能採用新電池設計，希望可以令汽車續航時間提高，有傳計劃使用磷酸鐵鋰（lithium iron phosphate, LFP)，呢種物料唔容易過熱而且成本低。不過又咁講，如果蘋果汽車可以同iPhone或iPad結合，推出更多新功能，或者唔會比Tesla差，甚至會更重CyberPunk味道添！

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情