收藏文章 

2021-04-12

《Online有話兒》數字美元助美國避淪「香蕉共和國」?比特幣仍然升唔見頂!

  正所謂「今日高位,明日低位」,呢句說話應用係比特幣真係無錯,事關比特幣係過去個周末又破頂見61100美元關口,每次想搵位買嘅時候都買唔手。近期市場咁波動,皆因班央行大佬終於醒覺,開始搞數字貨幣,唔知而家算唔算遲呢?

 

 

 (Shutterstock圖片)

 

鮑威爾:聯儲局正參與數字美元研發項目

 

 

  (Shutterstock圖片)

 

  正當中數字人民幣試點風生水起嘅時候,美國呢邊終於開始覺醒,知道數字貨幣係未來金融業嘅正軌,美聯儲大佬鮑威爾表示,而家聯儲局正參與一個大型數字美元嘅研究項目,並研究呢項技術嘅可行性。事實上,數以百萬計嘅美國人已經利用信用卡等非現金進行交易,數字美元都係遲早問題,不過鮑威爾都比較謹慎咁話:

 

  「對於數字貨幣,美國無需要成為第一個,係數字貨幣呢個問題上,我哋要考慮會唔會令人民受益呢?因此國會同公眾都會參與呢個討論過程。」

 

  都係嘅,作為一個經濟大國,貨幣係主導經濟去向嘅主要工具,不過中國、瑞典都開始測試緊數字貨幣,美國先話開始研究下,會唔會真係慢咗小小呢?

 

對沖經理Michael :美國唔盡快推數字貨幣將處於劣勢

 

  美國知名對沖經理Michael Novogratz早前接受訪問時候就話,如果美國唔盡快推出數字貨幣,將會處於好大劣勢:

 

  「如果我哋嘅財政同貨幣政策睇起來好似一個香蕉共和國,很快就會遇到某種【明斯基時刻】,信心就會崩潰。」

 

  作為比特幣大好友嘅Michael 認為,美國經濟體系如果仲好似啲高度依賴水果、礦產等出口傳統國家咁落後的話,就會好快迎來資產大跌嘅時刻,到時過多投機性債務出現,令到現金流短缺,咁就真係一發不可收拾啦!

 

美國最大線上數字貨幣交易平台Coinbase上市啦!  

 

 

 (Shutterstock圖片) 

 

  美國最大數字貨幣交易所Coinbase最近宣布已經獲得美國證券交易所(SEC)批准上市,並計畫於4月14日係納斯達克以直接上市(DPO)方式掛牌。所謂DPO,同傳統IPO上市唔一樣嘅係,公司雇員同本身已持股權嘅投資者,可以直接係交易所沽出手上股權套現,亦都唔需要有鎖定期之類嘅規條。

 

  Coinbase上市,市場估計係想擴大交易所市值,同時宣揚數字貨幣,皆因交易所本身未有太多集資需要。交易所有八成半收入來自客戶交易手續費,單單2021年首季收入就已經有18億美元,按年大漲8.44倍;純利為7.3億至8億元美元之間,按年同期大漲25倍。真係唔怕買貴,只怕買遲,比特幣大漲連帶洛陽紙貴,連交易所都受惠,唔怪得香港都有數字資產交易所啦!

  

撰文:李皆穎

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多Online有話兒文章
你可能感興趣
#理財 #Online有話兒 #比特幣 #鮑威爾 #Michael Novogratz #Coinbase #虛擬貨幣 #Bitcoin
編輯推介
即時報價
全文搜索
Search
最近搜看
雙幣交易
財政預算案2024-25
More
Share