15/09/2021 17:02

《古臣雙周記-古臣》大市偏淡沽清地產劵商,繼續於低估值股搵食

  科技股呢兩星期技術反彈完,近期又跌返落嚟,搞到連二十天線都穿埋,港股走勢認真弱,再加埋賭仔今日玩鑊大嘅,睇怕都唔會跌一兩日就完事。依家恒指日線圖形態似一浪低於一浪,兩個負面因素加埋,恒指係有機會跌穿8月下旬低位24581點位置,暫時看阻力位於今個月頭頂位26568點。
  跟住落嚟除咗睇實神州有乜政策要推之外,資金流都係一個問題。紐約聯儲銀行嘅每月調查結果顯示,美國消費者對通脹嘅預期升至8年新高,亦係連續10個月上揚。花旗國聯儲局一直以瓶頸效應嚟解釋通脹向上,但最新公布嘅花旗國首次申領失業救濟金人數好過預期兼再創疫情以嚟新低,反映通脹同就業率係同步向上,美聯儲23號公布嘅議息聲明有機會比市場預期更鷹。至於神州方面就唔洗太擔心,噚日官媒先吹風話人行有可能會將MLF縮量,今日證實得個吹字。近呢幾個月神州啲經濟數據都唔係咁好,再加埋兩次水浸,神州央行落收水決定應該會審慎啲。

*想買平嘢,睇好聯想控股同光大水務*

  但就算個市唔掂,股仲係要炒嘅,阿臣揀咗兩隻股玩吓。第一隻就係聯想控股(03396)。首先,公司中期業績表現非常標青,純利46﹒91億銀人仔,按年大升6﹒36倍,創歷史最佳半年業績表現;期內收入2285﹒65億銀,按年升近24巴仙,係自2017年以來連續第9個報告期實現增長。
  之前無點炒,主要因為以前資金主要炒科技股、醫療股等高估值股為主,但現階段監管當道,科技股自然無運行;醫療方面神州就推出帶量採購,令醫療股嘅短期增長空間減少。阿臣就估計資金會繼續喺低估值又有增長嘅股份靠攏。
  呢間公司主要投資於從事IT、金融服務、創新消費與服務、農業與食品、新材料及財務投資業務。呢類公司業務分工唔清晰,估值同業績自然較難去估,因為公司業務架構複雜所以一向唔太受歡迎。不過依家科技股同醫療股隕歿,除新能源、資源股外,魚缸強勢股選擇其實唔多。今次公司業績大躍進,自然重新吸引番資金。
  估值方面,其實平到無人有!預測市盈率僅約5倍,過去4年中位數約為8﹒6倍;預測巿帳率得0﹒41倍,過去4年中位數約為0﹒6倍;預測PEG比率為0﹒12,反映估值嚴重低估,所以用估值望,博再炒多轉都唔出奇。
  另外,CCASS顯示頭十位券商對其持倉集中度繼續提升,散戶參與度持續低企,博客就幾鍾意呢種利好訊號。博客建議現價大約17銀小注買入,目標望25銀先,但收穿15﹒6銀走佬!
  第二隻為中國光大水務(01857)。阿臣就覺得水資源對於人類嘅重要性不言而喻。由於全球人口增長、氣候變化、湖泊河流退化,地球嘅水資源正在面臨壓力。而《聯合國世界水發展報告》(2021年版)重點指出,2030年,全球將會面臨40巴仙嘅水資源短缺。所以,建立同維護良好嘅供水系統係非常重要,以基本面去望水務股絕對唔太差。
  另外,國策亦都有新政策利好水資源發展。發改委同住建部最近公布對水供應新規將於10月1日正式生效。新規嘅目標係為城市水收費設立標準,推動水資源供應發展。聽講新例安排下,水費重置周期會由3至4年縮短至3年,而計算程式則會以回報成本為基準,變相有利水資源營運商提升項目回報。
  業績方面亦唔失禮,公司中期盈利為5﹒48億銀,按年升36巴仙;收入按年增長47巴仙至31﹒13億銀;毛利按年升41巴仙至12﹒4億銀。今次派0﹒0575銀中期息,息率都超過3厘咪話少!另外,魚缸依家鍾意炒低PE嘅公用事業股,光大水務絕對符合魚缸目前口味。
  估值方面,目前預測市盈率4倍鬆啲,預測市賬率僅0﹒44倍,其實相當平,要炒起空間都可以好大!公仔圖方面,其實呢年嘅上升趨勢非常好,目前挑戰約1﹒5銀至1﹒7銀嘅上市無耐嘅阻力區間。近期見成交開始增加,加上即使魚缸調整,股價依然非常硬淨。建議1﹒76銀買入,目標價上望招股價2﹒99銀,但收穿1﹒59銀走佬!記得小注,因為個盤好乾!

*沽九倉、中金*

  阿臣個倉都好耐冇郁過,今次決定將九倉(01997)同中金(03908)沽清,香江「來港易」今日起接受登記,身處廣東省同馬交嘅非香江居民可以免檢疫入境,對九倉嚟講都唔知係好定壞,中資劵商股炒萬億成交似開始冇力。
  舜宇光學(02382)預期受惠iPhone 13銷情,加埋聯想控股同光大水務,三隻股各入10皮嘢玩住先。

  沽出之股份及收益(虧損):

股份      股數    平均買入價(元)  平均賣價(元)  收益(虧損)(元)       
-----------------------------------------
九龍倉置業  2000股   32﹒00    39﹒05     14100
中金公司   2000股   18﹒22    22﹒40      8360
-----------------------------------------
套現:122900元

  股份        股數  平均買入價(元)   現價(元)  總值(元)       
  ---------------------------------------
  港股:   
  舜宇       400股   228﹒60  226﹒80   90720
  聯想控股    5800股    17﹒18   17﹒04   98716
  光大水務   54000股     1﹒84    1﹒92  103680
  港交所      400股   456﹒12  504﹒50  201800
  京東集團     100股   335﹒60  295﹒00   29500
  郵儲行     2000股     6﹒10    5﹒68   11360
  中國銀行   20000股     2﹒74    2﹒81   56200
  濰柴動力    3000股    19﹒36   18﹒02   54060
  ---------------------------------------
  股票市值    : 646036元 
  剩餘現金    : 338886元 
  組合淨值    : 984922元 

  *數據截至9月15日下午4時10分

全新節目《說說心理話》原生家庭對成長有咩影響?改善溝通有計可施?► 即睇

即時新聞
即時報價
全文搜索
Search
最近搜看
雙幣交易
財政預算案2024-25
More
Share