《笑傲缸湖》米字國王子哈利同梅根嘅大婚都差唔多過咗一年，雖然盈盈同一眾少女依然咁傷心，不過對皇室嚟講今個年度係最開心嘅一年，因為皇室年度收入創咗紀錄，有逾２１７０萬鎊啊！除咗有賴哈利大婚帶動之外，今個年度皇室嘅慶祝活動一浪接一浪都有唔少幫助。　　皇室嘅年度ＲＥＰＯＲＴ提到，皇室產品零售額鏟高到２１７０萬鎊，比上年１８２０萬鎊大增３５０萬鎊，主要有賴皇室唔同嘅慶祝活動，例如哈利大婚、路易小王子出世、尤金妮婭公主大婚、查理斯王子嘅７０歲大壽，繼而衍生嘅紀念版瓷器網上銷售大增。不過，都有賴「事頭婆」最愛嘅柯基，因為一系列可愛嘅柯基玩具都有唔錯嘅銷售表現。　　當中最有少女心嘅一定係哈利大婚嘅粉藍陶瓷茶具，寫有兩夫婦嘅簡寫「Ｈ．Ｍ」。路易王子嘅紀念陶瓷茶具就比較「金碧輝煌」，中間仲用咗皇家武器上嘅幼獅同獨角獸，別具風格。親王７０歲大壽嘅茶具就充滿神州味道，用咗紅藍對比色，仲特別塗上咗親王嘅紅龍徽章、威爾斯國花水仙花。　　今年亦有唔少ＣＲＯＳＳＯＶＥＲ產品，著名設計師兼插畫家Ｋａｒｅｎ　Ｍａｂｏｎ設計嘅一系列柯基絲綢睡衣、眼罩同圍巾，同Ｖｉｃｋｉ　Ｓａｒｇｅ設計嘅皇冠同一系列珠寶都生色唔少。　　白金漢宮嘅訪客都創紀錄有３３０萬人次，而上年只有２９６萬人次，其他收入包括禮品援助亦由４０８０萬鎊增加到４８３０萬鎊。　　皇家收藏信託基金會今個年度亦都喺米字國各地舉辦咗２２場展覽，包括哈利大婚同尤金妮婭公主大婚嘅服裝展覽，展出咗過百件藝術品。　　ＲＥＰＯＲＴ亦顯示，皇家去年收集咗２７０２８份文字藝術品、４１７３９份圖像藝術品、１０１８件裝飾藝術品、４８８張照片、１９１１本書和手稿、２７１幅畫。　　目前幾乎所米字國皇室成員都已經結晒婚，豈不是皇室之後嘅收入好難再好似上年度咁多？不過，皇室產品嘅「孖屐停」做得咁好，產品設計有鬼咁靚，盈盈都有Ｄ心郁郁想買返幾份，相信就算冇大型婚禮撐場，皇室收入應該都繼續有唔錯嘅增長。

　　《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情