《笑傲缸湖》寶島嘅國民黨內初選民調出爐啦，高雄市長韓國瑜以約４５巴仙嘅支持率完勝鴻海集團創辦人郭總（郭台銘），將代表國民黨參加明年寶島大選，挑戰爭取連任嘅民進黨蔡英文總統！呢個消息一出，幾隻專做旅遊觀光相關生意嘅高雄概念股，好似拍哂手掌咁，熱烈地慶賀市長打勝仗，股價個個都彈高，高野（台股編號２７３６）、華園（台股２７０２）就升到停板，而國賓（台股２７０４）飛起半成。　　風水輪流轉，郭總所擁有嘅鴻海（台股２３１７）股價曾跌過２巴仙，尾市倒升返半個巴仙收市，叫做無咁肉酸！而佢旗下喺香江上市嘅富智康（０２０３８）依家跌緊１巴仙。　　原本郭總會喺今日開記招交代一下，就因為民調落選咗，面懵懵到連記招都唔想開，即刻臨時叫停。郭總嘅競選團隊就代佢解釋話：「因為啱啱先初選完，郭總需要啲時間去沉澱思考吓。」郭總都有發表聲明，恭喜韓國瑜贏得初選，並給予祝福，但未有說明會否退出國民黨。依家大家都估估下，郭總會唔會退黨，並夥拍台北市長柯文哲（柯Ｐ）參加大選。　　寶島大選明年１月１１日先舉行，仲有半年時間，期間民意取向變化，傾向藍營定綠營，定係素人政治異軍突起，呢場選戰相信好睇過戲，買股投資更加要金晴火眼睇實呀！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇