《笑傲缸湖》連鎖快餐達美樂（Ｄｏｍｉｎｏ’ｓ）最出名咪就喺賣ｐｉｚｚａ嘅，之不過原來佢嘅科技都不得了！因為達美樂經常試新野，去改善送外賣嘅程序，就好似依家客人可以用表情符號去落「柯打」、同用人工智能去叫ｐｉｚｚａ等等。而達美樂嘅下一個計劃就喺要用公司嘅移動應用程序去實現實時訂單跟蹤，確保成個送外賣嘅過程都無甩漏！　　達美樂已經喺應用程序同網站上面，提供咗披薩嘅追蹤功能，令顧客喺街訂咗外賣，都可以一邊睇住個實時追蹤功能，預定外賣仔幾時會喺屋企門口，唔洗急急腳返屋企。達美樂推出嘅實時功能同坊間嘅有啲唔同，佢唔單止係客戶，連達美樂嘅特許經營者都可以運用到新功能裡面嘅數據，去注意到特定嘅路線會唔會塞車搞到延誤，仲可以話畀駕駛員知邊條路可以行快啲，從而去減少延遲同提高佢哋嘅效率！而且即使個客唔係喺達美樂嘅應用程序到訂ｐｉｚｚａ，而喺用其他訂單應用程序如Ｄｏｏｒ　Ｄａｓｈ等等，都一樣可以追蹤到達美樂送外賣嘅行蹤，認真好強大！　　好可惜嘅係，達美樂表示呢個功能暫時只會喺花旗國推出，而推出時間將會喺年底，不過暫時未知新功能會唔會喺花旗國全部嘅達美樂嘅餐廳度上架。　　另外，達美樂噚日出咗第二季成績表，雖然賺多咗超過一成九至９２３６萬美金，但達美樂喺花旗國嘅直營門店同店銷售額僅增長超過２巴仙，係近呢７年以嚟最低，表現相當麻麻，主要因為競爭對手同第三方快遞嘅激烈競爭所致；而第二季營業收入只係踢高超過４巴仙，至８﹒１２億美金，差過「孖屐」預期嘅８﹒３６億美金。　　最新業績唔係太省鏡，咁就只好唯有寄望佢嘅外賣追蹤功能可唔可以幫達美樂翻身啦，畢竟呢個新功能可以令到外賣更快送到去消費者手上，而且又可以追蹤，做生意唔夠Ｃｒｅａｔｉｖｅ，又點能夠脫穎而出呢！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情