《笑傲缸湖》依家歐美疫情依然嚴重，大家當然最好要同心協力共渡難關，其實係基本野啦！如果呢個世界個個都安分守己，世界自然更美好，但邊有可能吖！最近就出現「只許州官放火，不許百姓點燈」，講緊嘅就係加州州長紐森（Ｇａｖｉｎ　Ｎｅｗｓｏｍ）。　　加州上周五（１３日）先將「限聚令」加辣，限制所有私人聚會，最多只有３個家庭參加，更唔可以大聲傾計甚至唱歌。不過有當地媒體爆料，紐森係１１月６嘅於酒鄉納帕（Ｎａｐａ）參加政治顧問Ｊａｓｏｎ　Ｋｉｎｎｅｙ搞嘅５０歲生日ｐａｒｔｙ，仲比人捉到現場多過３個家庭，明顯違反自己訂下嘅規定。根據《霍士新聞》報道，派對有１２人，一共有６個家庭參加，晚宴係一個四面密封嘅房間舉行，仲影到房間內無人戴口罩！　　雖然紐森日前已經為事件公開道歉，聲稱佢同太太事前並唔知道會有咁多人到場，佢話自己應該馬上離席、揸車返歸，但佢仲坐低用餐，真係好抱歉喎。　　盈盈唔清楚呢番解釋有幾人接受啦，不過其實紐森係第一個「放火」嘅政客。喺８月底民主黨籍眾議院議長佩洛西（Ｎａｎｃｙ　Ｐｅｌｏｓｉ）就被發現喺三藩市一間理髮店內恤髮，而當時加州係禁止室內美容活動。　　其實到呢個抗議關鍵時刻，盈盈知道大家其實已經好努力抗疫，但盈盈知道可以做得更好，例如去少啲Ｓｔａｙｃａｔｉｏｎ同去酒吧等等。希望香江官員都可以繼續以身作則，大家忍耐多陣，出咗疫苗之後就會海闊天空！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情