《笑傲缸湖》早喺今年三月，新冠肺炎疫情席卷全球，花旗國有唔少工廠都中咗招，包括當地肉類加工及包裝行業，有幾千名工人受到感染，搞到泰森食品同等公司，要暫時關閉爆發疫情嘅屠宰場及加工廠。　　不過泰森食品位於愛荷華州嘅一座大型豬肉加工廠，原來一直無停工，自新冠肺炎疫情爆發以來，累計已經有超過１０００個員工中招，人數佔到全廠員工三分之一以上，更加有５名感染者喺被強逼繼續返工後死亡。　　其中４名死亡工人家屬喺今年８月聯合向工廠提出訴訟，根據當時美聯社報道，家屬狀告工廠為咗資本利益而忽視疫情風險，工人喺無配戴口罩或者面罩嘅情況下開工。工廠甚至為咗掩蓋疫情真相，容許已經出現病症嘅工人繼續喺廠內工作，聲稱新冠肺炎只係流感，話表示每個人都會感染，仲阻止工人去做新冠病毒檢測，命令佢哋繼續上班。家屬話工廠完全係漠視工人嘅身體健康，無盡到保護工人健康安全嘅義務。　　不過，當時泰森公司就解釋，公司係應侵侵嘅要求先繼續開工，又話工廠嚴格執行防疫措施，並唔存在忽視工人健康安全嘅問題喎。　　最近泰森又被媒體踢爆，工廠經理哈特（Ｔｏｍ　Ｈａｒｔ）居然喺內部下注，賭有多少工人會感染新冠肺炎！今次泰森回應得好快，發言人話，仲要再了解一下發生咩事，不過如果證據確鑿，佢哋將會採取一切必要措施，根除呢種令人不安嘅行為。連花旗最大肉類包裝工會聯合食品和商業工人國際聯合會主席佩羅納都話，主管強迫患病工人繼續工作，並且下注賭博嘅報道令人震驚。　　唔經唔覺，新冠肺炎疫情已經「陪伴」我哋差唔多成個２０２０年，相信大家都慣咗日日戴口罩，對第Ｎ波疫情可能仲有啲麻林，盈盈就覺得，點都唔應該攞人命嚟開玩笑，亦都都希望大家繼續提高警覺，等疫情可以盡快結束。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇