《笑傲缸湖》由上太空去到起隧道，Ｔｅｓｌａ真係好似多啦Ａ夢咁無所不能，不過「鋼鐵俠」馬斯克嚟緊想搞嘅新Ｐｒｏｊｅｃｔ就比盈盈想像中貼地，今次佢竟然想去整冷氣機！　　馬斯克最新喺Ｔｅｓｌａ股東大會到話，可能喺出年就會開始攻佔冷氣機市場，仲話Ｔｅｓｌａ可以製造到比現有產品更高效率，更慳電同更安靜嘅冷氣機。呢啲如果係第二個講就似吹水，但依家係馬斯克講，就嚇到幾間櫻花國嘅家電公司都心慌慌，大金嘅管理層仲開聲話想同Ｔｅｓｌａ合作。　　馬斯克勁有自信咁話Ｔｅｓｌａ冷氣機會體積細效率高。仲要無論身處沙漠咁熱，或者雪地咁凍嘅地方都好，部機任何情況都可以運作到，行內就估佢要將車用冷氣機改造成家用冷氣機，例如今年推出嘅Ｍｏｄｅｌ　Ｙ配備嘅熱泵式冷氣，就比傳統嘅車用冷氣更有效率。　　不過，車用冷氣使用嘅製冷劑種類同設計，都同家用冷氣上有分別。加上轉型造家用冷氣，需要提供安裝同維護等嘅服務。德國諮詢公司羅蘭貝格嘅合夥人貝瀨齊就認為，冷氣機行業都可以效法高科技產業，通過合作提升發展速度，甚至合縱連橫咁話。　　但係其實係人都知馬斯克佢醉翁之意不在酒，今次整冷氣都係為咗幫Ｔｅｓｌａ鋪路，等佢成為真正嘅再生能源公司。近呢幾年Ｔｅｓｌａ一直喺能源業務到俾心機，２０１５年推出咗家用電池Ｐｏｗｅｒｗａｌｌ，２０１６年就收購埋花旗國太陽能設備公司ＳｏｌａｒＣｉｔｙ。依家再整埋節能冷氣機，隨著一塊又一塊拼圖慢慢砌好，Ｔｅｓｌａ令世界擺脫化石能源嘅目標可能真係不遠矣。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇