《笑傲缸湖》新型肺炎令經濟萎縮，相信冇乜人會唔同意，但聯合國婦女署最新公布咗啲全球數據，話今次疫情可能仲令男女性別平等嘅狀況時光倒流２５年。講得時光倒流，就當然係壞事，聯合國婦女署發現，有唔少國家及地區嘅婦女自疫情以嚟，花多咗時間做一啲無償工作，例如家務、護理工作咁，造成影響佢哋經濟進步同獨立性嘅連鎖反應。　　係咁嘅，喺疫情爆發前，估計喺全世界每日嘅１６０億個鐘頭無償工作之中，大概四分之三係由女人做，即女人同男人無償工時之比係３；但疫情之後，署方估計數字起碼升一倍。　　最新數字喺巴基斯坦、阿富汗、菲律賓同土耳其等國家，唔少婦女花多咗時間做無償工作，其中土耳其同阿富汗嘅情況最嚴重，分別有８９巴仙同７７巴仙嘅婦女做多咗。婦女署副執行主任話，好多婦女實際上係冇重返勞動市場，單指９月喺花旗國，就有大約８６﹒５萬名女性脫離勞動市場，而男性得２０萬個，差距係３倍幾，相似嘅情況係有機會令婦女嘅就業同教育機會流失。　　該署副執行主任認為，呢啲情況大部分可以用護理工作嘅理由嚟解釋，周圍冇其他人可以幫到手。從事大量無償工作嘅婦女得返好少時間做有償勞動，面臨財務上嘅不安全感。　　盈盈覺得，如果單就進行無償工作嘅時數嚟衡量性別平等嘅狀況有冇倒退，實在有啲武斷，事關有價值嘅嘢唔係只得錢，不排除有啲婦女好鍾意做家務或者認為同仔囡相處嘅時間好有價值。講返９月花旗國嘅例子，疫情之下可能係ＩＴ或者運輸行業比較發達，假設冇乜女性做上述兩行，佢哋被迫留喺屋企，做下護理工作都好合理，而唔係家務太多所以被逼脫離勞動市場。　　不過，疫情下家庭雜務多咗，婦女做多咗嘢係事實，唔係因為有咩數據，而係生活經驗可以睇到。希望男士人們争氣啲，唔好咁懶一齊做家務，同家人關係會和諧啲㗎！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇