《笑傲缸湖》試想像一下，依家你去咗見工，份工係一份普通文職，平時都唔使點見客嘅，你筆試表現都好好，結果喺面試嘅時候緊張得滯，講咗幾句ｋｏｎｇｉｓｈ，之後坐喺你對面嘅老細忍唔住笑咗出聲，之後同你講：「Ｗｅｌｌ，我諗我哋都係比唔到個ｏｆｆｅｒ你架啦，或者你去進修下英文先搵工？」你心諗，點解我淨係講咗兩句有口音嘅英文，就ｒｅｊｅｃｔ我咁唔公平，明明唔關我工作能力事！但係你唯有接受，因為呢個係社會嘅問題。　　每個地方都有口音歧視，呢個問題喺法蘭西就比香江嚴重得多。喺巴黎，如果你講唔到一口標準嘅巴黎中產法文，唔好話見工，平時同人傾計都要比人笑到面黃，只要你有少少地方口音就會比巴黎人鄙視。如果你想從事廣播、政治，或者教育，甚至單單係打吓ｃｏｌｄ　ｃａｌｌ嘅工作，而你又有南方口音，咁其實都已經唔使諗。連堂堂法蘭西總理卡斯泰，講嘢有啲西南口音，都要比人喺議會嘲笑。　　好彩社會係會進步，法蘭西近日發起咗個反口音歧視行動，為３０００萬名人有口音嘅法蘭西人爭取權益，即大約全國人口嘅一半，噚日國民議會就提出咗一份議案，以後因為口音而歧視個人，將會被視為犯咗勞工法同刑法。　　這份議案嘅發起人厄澤話，喺法蘭西講嘢有地方口音嘅話，自然會俾人當做鄉下佬，雖然法蘭西總理卡斯泰都有口音，但唔代表歧視唔嚴重，反而卡斯泰依家即使位高權重，仍然要受口音困擾，更加顯得法蘭西嘅口音歧視問題有幾大鑊。　　不過，諗諗下其實香江都唔好得去邊，我哋咪一樣對啲講唔正廣東話嘅新移民有偏見，可能佢係滿口鄉音，但人哋未必一定係對社會冇貢獻落嚟呃綜援，都有部分係用心付出建設香江嘅好市民，試下除咗個有色眼鏡睇嘢會清楚好多。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情