老何伸手入褲袋，拿出銀包打開一看，裏面沒有多亦沒有少，只有三仟元港幣。今天已是年廿七，他不禁惆悵，三仟元如何可以在過年時足夠開銷。

　　正在想到入神之際，一位老太太悄悄地走近他的小店，跟他搭訕：

　　「亞叔，你知唔知有冇人買字畫？」

　　「乜嘢字畫？我唔識架。」老何問。

　　「冇，我伯爺以前留下幾個樟木櫃，裏面放滿字畫，我又唔識，我個仔同新抱又唔鍾意，唔係拎去送人，就係由得佢哋發霉，把鬼火。我呢次喺加拿大返嚟，愈諗愈谷氣，不如賣鬼哂佢哋，揾多幾個錢傍身。頭先我拎去嚤囉街專收字畫的店舖，想話賣俾佢哋，點知佢哋一聽見係枝山道人嘅字，就話睇都唔使睇，一定係假貨。有一個老闆仲衰，問我枝山道人係乜水，我識鬼咩！」老太太不停地說。

　　「係？咁你要賣幾多錢？ 我唔識架」，老何半信半疑地回答說。

　　「三仟蚊加幣」，老太太說。

　　「三仟蚊加幣就冇嘞，我三千蚊港幣就有，拎出嚟睇下」。老何心諗，唔係遇著個女騙徒，連三仟蚊都被佢呃埋，搞到過唔到年咁黑仔掛？

明  祝允明  行草詩卷  水墨紙本  手卷（點擊看大圖）

　　老太太聽他說完，從手抽袋拿出一個手卷，交給老何。老何拿出門口，在陽光下將它慢慢打開時，一陣霉味攻鼻而至，只見密密麻麻寫滿了幾百個字，卻認不得幾多個，但見卷尾亦有很多人寫字，卻一個都不認識，唯一認得的，是「枝山道人」幾個字。他心想，就算是假的手卷，當舊貨賣，每個字計，幾百個字，怎様算都值幾仟元掛!

　　「太太，三仟蚊加幣我就冇嘞，三仟蚊港幣就有，一人一半，俾我留番仟五蚊過年好唔好?」老何問。

　　「又好，見你咁老實」，老太太回答說。

　　老何交付了仟五元，取了手卷，便送老太太走。老何專門買賣雜貨，小店在嚤囉街一條橫巷。老何送老太太走上荷里活道，想替她截的士，原來她的司機坐在一架老爺平治上等她。

明  祝允明  草書七言詩賦  水墨紙本（點擊看大圖）

　　老何回到店舖，愈想愈不放心，怱怱忙忙拿出手卷，跑到嚤囉街中心一條長巷，慢慢將手卷打開。一個西裝友剛剛經過，對手卷瞄了幾眼，主動跟老何說：

　　「亞叔，你幅字賣唔賣?」

　　「賣，你出幾多錢吖?」老何回答說。

　　「兩萬賣唔賣?」西裝友問。

　　「出價咁低，梗係唔賣啦」，老何也不傻。

　　「咁你要賣幾多錢，開個價啦」，西裝友不耐煩地說。

　　「我諗下先啦」，老何根本就不知價，亦不知究竟誰是枝山道人，有甚麼來頭，唯有敷衍地說。

　　「咁，十萬賣唔賣？」西裝友太心急，一下子就露出馬腳。

　　老何心想，西裝友由兩萬加到十萬，證明幅字是真品啦！賣給他，可能走咗隻大肥雞。他再想一想，覺得還是找一個行家跟跟眼比較穩妥，隨即收起手卷，跟西裝友說一聲「唔賣」，便揚長而去。

　　走到去華樂茶室，看見一位行家正在一邊看小說一邊喝凍檸茶，老何走近他身邊，細細聲跟他說：

　　「老闆，幫我睇幅字得唔得?」

　　「乜嘢字咁神秘?」行家問。

　　「枝山道人」，老何細細聲回答說。

　　「唔係掛，喺邊度?」行家問。

　　「喺我度，太長，好唔好喺嚤囉街中心打開俾你跟跟眼?」老何用懇求的語氣問。

　　「好呀，等我飲完杯凍檸茶就走」，行家回答說。

　　兩人走到嚤囉街中心的長巷，老何慢慢將手卷放在地板上打開。行家站著看了良久，再蹲下來仔細看明清以來各收藏家的題跋、印章，心中不禁嘀咕，不明白一件祝枝山的真蹟，如何落在一個不識書畫的人手上。

　　老何見他面上一陣紅，一陣白，心中十五個吊筒，不期然七上八落。

　　「老闆，真定假，枝山道人係邊個，邊一個朝代?」老何急不及待地問。

　　「係祝枝山，唐伯虎嘅老友，明朝，睇字，睇題跋、印章，睇裱工，應該唔會假，只係殘舊一啲和有破損啫，你想賣幾多錢？」行家回答說。

　　「老闆，你做好人做到底，幫我拎去拍賣得唔得？」老何戰戰競競地問。

　　「冇問題，但係拍唔出有幾萬蚊使費，你知唔知？」行家回答說。

　　「我知，我知，拜託哂。」老何滿心歡喜地答。

　　幾個月後，祝枝山的手卷由幾個大陸行家合夥在佳士得以六十多萬港幣拍走。一年多後，同一幅手卷在杭州一間拍賣行以一百多萬人民幣拍出。兩年後，再在北京以三百多萬人民幣由一個收藏家買走。

　　老何自從那一天之後，一有空就坐在荷里活道與東街交界的消防龍頭上，希望老太太(對他來說是送錢觀音)再一次出現。而我，每一次在華樂茶室碰到他，總是笑他很快會變成「望婦石」。