06/05/2016

愛是恒久忍耐?

  • 加入最愛專欄
  • 收藏文章
  • Ayu 阿愚

    Ayu 阿愚

    曾任職傳媒行業,不學無術,筆耕半生才悟出「識人好過識字」的大道理。患有輕度社交障礙,依靠與異性溝通來緩和不安情緒;習慣在單身主義與渴求歸宿的兩極中矛盾穿梭。

    我單身但我快樂

    逢周三更新

Photo: iStock Photo

  盛女聽得最多的那句話,可能是:「仲想揀呀?到咗呢個年紀有人肯要你,話之佢高矮肥瘦乜都好,嫁咗出去至算啦!」

  但假如對方的缺點觸及你的底線,又如何?

 

  任職於教育機構,單身超過六年,女友E本以為自己下半生就這麼一個人過;誰知去年搬家的時候,竟與那個替她辦理樓宇買賣的地產經紀戀上。

 

  「佢細過我,幾多年就唔好講啦!上年我想搬間大些少嘅屋,所以識到呢個男經紀。搵樓加放樓,我哋keep住見咗幾個月,初頭大家都估估吓,我覺得佢未必對我認真,加上我哋係agent同客嘅關係,所以都懷疑過佢係為咗錢至對我好!」E說。

 

  以佣金作為主要收入的工種,注定會被誤解成靠建立關係去達成銷售目標;E觀察了好一段時間,相信男友並非存心「騙財騙色」,「我年紀大過佢,要呃都呃個後生啲或者有錢啲啦!我咁耐無拍拖,都怕hurt㗎,反而佢就對我愈來愈好,一步步畀信心我;不過,其實我始終仲係好忐忑!」

 

  何以忐忑?就是在沙漠看到水源,都會先懷疑是海市蜃樓嗎?還是習慣了一個人,不敢相信原來真有命定這回事。「佢雖然對我好好,但我見佢對其他人嘅態度都好差,成日都好暴躁,無禮貌,又唔識尊重人;例如同佢睇concert,佢全程繞埋對手唔拍掌,佢話而家唔係免費show,個artist收咗錢就要唱歌,使乜嘥力拍手掌喎!就算食嘢買嘢都係一樣,喺佢眼中畀咗錢就大晒,同埋佢其中一個口頭禪係『信唔信我投訴你吖』,成日小事化大,四周圍點火頭……每次當我聽到呢啲說話都會好反感。」E嘆了一口氣。

 

  難怪她如此躊躇!我想起一位女藝人的丈夫,為了阻止狗仔隊狙擊,竟向對方的面上吐口水;作為妻子看見這一幕,情何以堪? E的男友雖然未至於那麼極端,但站在他的身旁,感覺大概也不太好受吧!

 

  E形容這段感情的起伏就像坐過山車,「直到呢一刻,我都依然覺得自己唔一定需要戀愛,另一方面又會諗,既然機會出現咗,我係咪又唔應該白白錯過呢?想深一層,如果佢唔係對我咁好,單睇性格呢個人根本就無令我考慮嘅餘地,唉……真係有又煩,無又煩!」矛盾是,當他對你毫無虧欠,甚至將最好的自己留給你,還有甚麼好抱怨?E不是沒有想過要改變他,只是,當中預計所需要花費的時間心力,可能已耗盡了所有愛的能量。一旦放手,重回盛女行列,又會否比這一刻更好過?

 

  遇上優秀的人,他唯一的缺點,就是沒有愛上你;那個很差勁的,沒甚麼好,偏偏待你如珠如寶,緣分若此又能怪誰?缺點這東西,人皆有之,只有瞎了心眼才會視而不見;也許,要令缺點徹底消失的方法只有一個……

 

  麻木。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

我要回應

You May Also Like

沒有相關資料。

放大顯示
名廚食譜

Immerse yourself in Arts Month

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ