搵工求職的最高境界，是讓筍工主動搵上門——被獵頭（headhunted）。各有前因莫羨人，各位搵工搵到金精火眼的求職者，別以為「被獵頭者」蹺埋雙手等運到就有好工埋身——人家總得付出大量努力與心血，絕非一句「好命」可以說得清。

要成為職場搶手「獵物」，CV可以不寫，但一定不可以不懂以下5招︰

1、基本嘢要做足

　　求職者要躋身「獵區」，必須時刻裝備自己，保持「被獵」狀態。方法不外乎︰努力工作爭取表現、緊貼市場走勢、掌握潮流脈搏、積極進修，與時並進，保持競爭力等「鬼唔知阿媽係女人」的事。這是最基本，不然一味懵盛盛「等運到咁樣」，不嚇走獵人已經要偷笑。

2、線上線下全天呃like

　　求職者要全天候吸引「獵人」的注意，線上線下的策略都不容忽視。線上，求職者不妨善用社交網站如facebook和LinkedIn等，分享CV及工作點滴，公開推銷自己，建立「個人品牌」；線下，宜多出席社交活動，拓闊職場人際網絡。

3、派卡片賣廣告

　　職場上，卡片就是廣告時間廣告位，只要拿捏得當，自能收宣傳之效。姑且不研究何謂「拿捏得當」，總之有殺錯無放過，見人就派——除非完全九唔搭八。誰是「九唔搭八」？唔使教啦卦！

4、成一家之言

　　一般來說，獵頭搶手貨必有過人之處，例如特別靚仔、特別紅、特別有料到。而天生我才必有用，每個人都有自己的selling points，建議求職者深入了解自己，並就相關專業範疇建立「一家之言」。寫博客和專欄等，都有助提升知名度。

5、主動出擊

　　的確，「有麝自然香」，大前提是人地識咗你先囉，不然只能孤芳自賞。要被獵，就要去接近獵人。求職者須主動聯絡所屬行業的獵頭公司，與獵頭族打好關係，贏取筍工第一手消息。

　　原文刊載於ctgoodjobs.hk