話咁快新政府都上咗場近兩個半月，「試用期」就快滿，都可以話唔新喇！但係班子都仲未齊腳，雖然大家都估9月之內會埋晒位，之不過相信有唔少讀者都同Jenny一樣咁心急，好想知仲有邊啲人肯踏隻腳入呢個冷卻咗少少嘅熱廚房。

「對手」變「助手」

　　隨住上個月尾民建聯小花蕭嘉怡辭咗區議員，去咗做張建宗嘅政助之後，Jenny就係到諗，點解同為司長嘅陳茂波（波叔）咁耐都仲未有聲氣嘅？結果今日就傳嚟新消息啦！據一網媒報道，波叔搵咗昔日嘅「對手」，商業電台嘅新聞及公共事務副總監何翠萍共事噃！「對手」變「助手」，唔知波叔係唔係想同薯片叔叔借鑒呢？

　　講返呢位傳說中嘅財政司司長政助先，點解Jenny會話佢係波叔嘅「對手」呢？皆因波叔第一次以財政司司長嘅身份發表《財政預算案》時，就去咗由三間電台聯播嘅《2017財政司司長熱線》回答記者質詢，而何翠萍（下圖左二）就係當時其中一位主持喇！

何翠萍CV Sharp 波叔識貨

　　主持得呢個咁重要嘅節目，說明何翠萍當然都唔嘢小啦！財經記者出身嘅佢已經喺商台做咗超過20年，仲係上年嘅新聞行政人員協會主席添！而佢除咗主持過啱啱提嘅《2017財政司司長熱線》之外，行政長官選舉候選人選舉論壇都有佢份㗎！而家喺商台主持緊嘅節目《經濟脈搏》，亦都相信唔少讀者都有聽過。何翠萍份CV咁sharp，波叔識貨呀！

　　其實傳媒人加入熱廚房都唔係新鮮事喇！要講最出名嘅都非薯片叔叔嘅政助、做過《明報》採主嘅羅永聰莫屬！事關連林鄭都當眾開金口問佢有冇興趣過檔幫手，而薯片叔叔一句「用錢都買唔到」就令阿聰人氣急升，亦都睇得出薯片叔叔幾睇重傳媒同公關同事！而上次Jenny都提過，今屆政府亦都有兩個大家成日見嘅傳媒人「聽講」會加入，分別係無綫首席記者吳璟儁，會做政制及內地事務局局長政助，同埋《城市論壇》嘅主持蘇敬恆就做食物及衞生局局長政助。有「蘇B」之稱嘅蘇敬恆雖然喺《城壇》放完暑假後做返主持，但當同事問到係唔係去做政助，佢就話未有新消息公布，不過有需要時會有同事替補主持一職噃！蘇B你咁講，係唔係即係默認先？