大學民主牆風波講左幾日都未平息，「責無旁貸」嘅教育大學校長張仁良究竟調查到肇事者嘅身份未呢？Jenny同一眾行家都好關注事態發展，等咗咁多日喇！今日見到採訪通知上邊有佢個名，仲拍埋校董會主席馬時亨一齊出席今年嘅「香港品格日」活動，咁應景？Jenny點都要過嚟望望先！

Bernard，你都好重要㗎！你講嘢我哋梗係會聽啦！

張仁良馬時亨齊「放飛機」

　　唔知係唔係佢哋兩位呢排太Hit啦，Jenny一去到見到好多行家，明顯就係等緊佢哋兩個嘅出現。只不過望返份新聞稿，咦？點解冇佢哋兩個個名嘅？拿拿臨去搵個PR問問先！

　　原來佢哋兩位今朝早齊齊「放飛機」，唔通係因為佢哋都feel到呢個活動「太特別」？明嘅！兩位都係唔想答返之前答過嘅嘢令到大家冇癮啫！好彩仲有個好耐都冇出嚟講吓嘢嘅行會召集人陳智思(Bernard)出現啫，Jenny先不至於白行一轉咋 ！

　　都係Bernard最心水清，完咗個活動就主動行埋嚟話:「你哋都係等張仁良呀呢？」哎呀！Bernard，你都好重要㗎！就算張校長有嚟，你要講嘢嘅話我哋梗係會聽啦！

Bernard話鼓吹「港獨」No Way！

　　Bernard咁耐冇講嘢，大家梗係最想知佢對民主牆風波有咩睇法。講到「港獨」佢就話要睇用咩方式討論嘅，Jenny一驚，心諗Bernard你都幾Open Mind喎！但係再聽落去，「討論了解點解港獨唔可行就得，但係鼓吹就唔得啦！」Bernard你咁講好容易令人誤會㗎！嚇到Jenny心仔都離一離呀！

　　至於而家民主牆嘅風波仲未平息，林鄭噚日都話唔想再評論，Bernard梗係都話呢啲嘢留返俾學校自己處理啦，仲話「外邊嘅人士」都唔適宜評論太多喇！唔知呢一席話係唔係講比聯署嗰班「外邊嘅人士」聽呢？