• |
  • 極速報價
  • |
  • 會員
  • 產品服務 / 串流版
  • 設定
過往專欄
言歸政傳
言歸政傳政經頑石不低頭為理發聲郎旋風薰香療法男士診症室抵玩自助遊句句有骨星座命理念力•氣功手機應用tips睛益求精嚴浩 LIKE!見微知著跟著陶冬找美食數碼潮人廣告有晴踏出退休第一步識食•惜食有種CEO叫做莊潮爆網事羅湖橋兩邊娛樂酷辣辣思歪思正十萬八千里樂本健‧教室特首選舉趣食60秒入廚101觀自然•觀香港有種生活政本清源心筆在妍維基解碼IT戰國誌煮酒論政今日趣聞馬壇.誌趣星期二周融愛瘋Apps美美道來大國崛起智醒日誌@中小企「營」刃而解Smart Buying甜品工房Education Calculator家事法庭升學信箱新手媽媽怪獸父母營營樂樂親子專題財富非常道謝國忠看勢獨唱團京城近觀原來如此乾坤挪移街坊食神Keyman森巴舞睇波LU文化導遊精神解碼抗癌兵團有營生活吾道崢廣見聞名家名畫商務英語型品薈我心中的米芝蓮歐洲直擊旅途中食得喜Leadership Coaching一哥教攝影心晴百態乳你同行專科專論人愛衣裝Word Discovery科技趨勢愛情故事投資達人政治擂台藝術投資秘笈抗癌點滴寵物情緣淘寶lization電影一線網絡鬼故主.管微博一分鐘管理娛樂有理進攻SAT古今名錶政‧經‧女人The Beauty Factor議會內外石油戰爭男女情色談金說匯風水環境學細味建築健康快車Green Hong Kong星光伴我行我吃過的米芝蓮A+孩子上海觀察京城札記鐵娘駕到食客三千創富新思維海外升學信箱Today's Web藝術投資世界在讀什麼-雷美華潮得起Business English飛越地球村紅酒情報職場物語股場琦手

05/02/2018

新東補選論壇娥姐玉姐大混戰 聽完笑到牙骹軟!

  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  今日喺電台入面嘅新界東補選論壇,真係名乎其實嘅「大混戰」!呢個唔畀嗰個講、嗰個唔畀呢個講……天氣好凍,但直播室就鬧哄哄!但聽住陳玉娥(娥姐)一人力戰其他對手,又疊聲又刺耳,Jenny耳仔猶如入咗恐懼鬥室!老細!小妹要報工傷呀!

 

  不過,論壇都係要夠亂先夠娛樂性嘅!Jenny睇過,6位候選人當中,鄧家彪(阿Bill)、范國威(咖哩飯)、方國珊(哪吒)同埋黃成智呢4位可謂身經百戰㗎啦!之不過對住兩位所謂「新手」:一位搶晒咪嘅娥姐,另一位「一心向主」嘅趙佩玉,小妹隔住耳機都Feel到4位嘅無奈!點解咁講?各位看官睇埋落去就知喇……

 

 

對住娥姐同玉姐九唔搭八放笑彈,阿Bill同哪吒忍笑忍得好辛苦!(商台節目直播片段截圖)

 

I'VE GOT THE POWER!

 

  女人真係唔得罪得。是咁的,論壇一開始仲係好地地,去到主持人同各位候選人傾偈嘅時候,兩位女士就嚟料喇!首先趙佩玉一嚟就「主耶穌」前、「主耶穌」後,仲話有姐妹同佢講見到天父畀咗個皇冠、權杖同埋斗篷佢,所以自己一定會當選,而且「當時有電流觸動我成身嘅感覺」添!

 

  主持人都忍唔住窒佢:「咁應該係選特首喎!」只不過趙女士斬釘截鐵咁話:「唔係!係選立法會!」好囉……之但係點解係揀新界東呢?呢個時候坐喺一邊嘅娥姐就搭嗲:「我囉、我囉!因為我囉!」Jenny就諗極諗唔明點解又關娥姐事呢?呢邊趙女士就繼續話係「上帝的感召」、「要臣服上帝」云云,兩位真係完美演繹何謂「雞同鴨講」喇……

 

娥姐談「緋聞男友」:AY完唔完美唔關我事!

 

  到同娥姐吹水嘅時間喇!前年娥姐就喺同一個地方大讚CY「太完美」,今日都唔例外,一講到現任特首林鄭、捲入僭建風波嘅律政司司長鄭若驊,娥姐第一個反應都係大讚「完美!」仲話司長同佢係「同類人」添!呃……娥姐呢句算唔算係讚美就真係見仁見智喇……

 

  然而娥姐愈說愈激動,這爆咪感覺怎形容?就係主持人都頂唔順,唯有叫坐隔離嘅黃成智幫手拉開個咪,相信唔少聽眾聽到嗰下都同小妹一樣「嘰」一聲笑咗出嚟!

 

  娥姐今次仲罕有談及「緋聞男友」公民黨黨魁楊岳橋㗎!話同AY 係「美麗的誤會」,仲話「佢完唔完美唔關我事」,唔知係唔係主持人都聽咗咁耐笑料,大嘆咗句「呢句最中肯」呀!

 

  淨係上半場Jenny已經笑到牙骹軟!Blue Monday有咁嘅娛樂,真係Thanks God喇!

 

邊個?邊個?邊個「講三級嘢」?

 

  去到候選人「互片」嘅時間,咖哩飯作為唯一一個最明顯嘅民主派,梗係受到各方圍插啦!正當Jenny以為娥姐都要力插咖哩飯,勢估唔到佢去鬧趙佩玉噃!鬧佢「講三級嘢」、「整污糟天主」、「係咁逼人聽佢講」,仲唔畀佢回應添!點解小妹橫睇掂睇,都係覺得娥姐講梗佢自己?只不過一開頭明明娥姐都冇乜同趙女士有衝突,何解突然咁火呢?

 

  等小妹即刻去Facebook睇前傳先!發現原來喺娥姐開火噴趙女士前,佢哋喺咪後已經有啲火喇……正確啲嚟講係娥姐突然開趙女士拖,嚇到咖哩飯都喺Facebook度出Po話「突發」、「娥姐開火:你講三級嘢」,仲話「我喺一邊唔敢亂插咀……」,再加多個「表示驚驚」添!搞完一輪,原來娥姐唔Like趙女士講同性戀議題,兩位阿姐牙齒印早在港台個選舉論壇已經出現。

 

毋忘共同目標:齊插咖哩飯

 

  最後主持人問各位候選人邊個喺論壇表現最差,除咗黃成智話唔評論任何人之外,個個都話係咖哩飯,只不過講原因係咩呢?大家就拉咗去講唔同意佢個立場嗰到,難怪Jenny見到有網民留言話「1-5號全部一家親」喇!不過咖哩飯都唔執輸,話返最大對手阿Bill先係最差。Jenny聽到呢到,就好似睇到一個小型議會咁,大家對一件事、一個人嘅睇法,從來都係立場行先,實際為後,難怪前大主席曾鈺成都話過大家「寧為喪屍,勿站錯邊」喇!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生