《施政報告》即將喺10月發表，所以不同政黨都開始會見特首林鄭，提交下建議！正經新聞當然要捕實，但花邊新聞都唔可以甩！近排嘅政圈花邊頭條，唔駛Jenny講，大家都知一定係容海恩（Eunice）嘅婚事啦！今日Eunice首次公開露面，行家們當然金晴火眼望下有冇「孕味」，亦唔少得旁敲側擊下係咪BB來了啦！

新民黨向特首提交《施政報告》建議，但大家焦點唔係份文件，而係Eunice身型。

爆婚訊後首次公開露面

　　冇計啦！唔到你唔承認，花邊新聞係多啲人想睇㗎喇，更何況Eunice將會開創歷史，成為立法會史上首位在任期間就結婚（甚至生B）嘅女議員。

　　話說，今日新民黨見完特首提交《施政報告》建議後見記者，Jenny同行家都一早去記者區霸定位，不過依Jenny睇嚟，大家關心嘅最大目標並唔係該黨提咗乜嘢建議俾特首喇！而係Eunice爆出婚訊之後，首次公開露面呀！

甜笑急步上車「孕味」唔濃

　　人哋話有咗BB就會有「孕味」，Eunice今日就一身黑衫，配彩色直條裙、腳踏低踭黑鞋，睇上去仲係好纖瘦，小腹未有特別隆起，同平日冇乜兩樣，但係淡妝之下，面色就一般喇，「孕味」唔算濃。行家等咗咁耐除咗問咗政策問題之外，又點少得問吓Eunice嘅近況，有行家非常直接，用英文問佢係唔係即將成為首個懷孕議員、會唔會為懷孕在職婦女爭取更多嘅福利……呢個時候Eunice師傅葉劉就即刻出嚟幫口「擋駕」話：「今日唔答私人問題」，「等下次其他場合先至再答啦！」Jenny幾時都話葉劉錫呢個徒弟仔㗎啦，幫佢擋埋記者嘅問題。之但係，如果Eunice真係BB來了，履行唔到議員職務，就唔係私人問題嚟喇……

　　記招過後，大家齊齊湧去Eunice身邊「圍恭」佢，再例牌問下身體狀況咁啦，Eunice就話「唔回應喇」；咁幾時預產期？要請定假噃！Eunice就邊行邊甜笑住答：「私人嘢唔講喇」、「無啊，無假啊，而家放暑假囉！」但佢就應承大家有婚照時會發布畀傳媒。問完一大輪，大家都發覺Eunice一直冇否認有BB呢個傳聞，在場各人都意味深長地笑了。真相係點，過多兩個月大家咪知囉，畀返啲空間Eunice啦！