前兩日Jenny同大家開心Share消防處嘅新吉祥物「任何仁」，點知第二日就收到風，話「任何仁」要被消失！？唔係卦？

「任何仁」喺消防處Facebook嘆住咖啡「報平安」。

「大嘥鬼」都要抽「任何仁」水

　　話說今個星期一（5日）消防處就搵咗一個成個阿凡達咁款嘅「任何仁」，喺記者會上示範用滅火筒同埋做心外壓，不過「任何仁」先生嘅形象實在太特別，結果就一朝爆紅，仲引嚟唔少網民惡搞改圖，呢兩日連其他政府部門都搵佢嚟抽水添！Any肥，Jenny睇而家各界反應咁熱烈，相信佢係繼「大嘥鬼」之後，第二個成功彈起嘅政府吉祥物嚟喇！

　　不過，噚日港台就話收到消息，話真人版嘅「任何仁」會消失，只可以卡通形象出場，話係因為「有違正面英雄形象」、「意識唔係咁好」喎！政府咁難得先再有多隻吉祥物彈起，玩咗一日就要彈走？

抽水點少得「大嘥鬼」。

隨時會落區 記得認住正版

　　港台仲話，「任何仁」係消防處嘅救護組諗嘅，而靈感就係來自於9個月前，消防處有幅宣傳心臟除顫器海報的藍色公仔。至於大家之前指住嚟笑嘅大肚腩「任何仁」，都係特登「選角」出嚟㗎！因為喜感大啲之餘，加埋蒙面就可以帶出「任何人都可以救人」嘅訊息喇！

　　「任何仁」要被消失嘅消息一出，大批網民即刻畀「嬲嬲」，紛紛去消防處洗版要求「保『任何仁』」。消防處睇嚟就聽到大家嘅聲音噃，今日高級消防區長黃宏亮就喺電台節目嗰陣保證返，真人版「任何仁」唔會被消失，以後仲不排除會落區添！叫大家多多留意未來動向咁話喎！

「任何仁」都冇內部消息

　　之但係之前話有高層唔滿意「任何仁」影響消防員形象，所以先引嚟「消失」危機，黃宏亮就話其實今次管理層畀咗好大嘅創作空間，而且有關創作都已經經過高層審批。而今日下晝，「任何仁」都喺消防處Facebook「報平安」，話自己都冇「內部消息」，被消失係「絕無此事」，又強調返「老細都唔知幾玩得」噃！點都好喇，而家「任何仁」唔使消失，大家之後仲有機會見到真人，都算皆大歡喜喇！