香港而家正處於流感高峰期，今次個流感喺幼兒方面就爆得最勁，所以今日政府都公布埋全香港嘅幼稚園同埋幼兒中心會喺星期六（26號）開始提早放農曆新年假，以防流感再大規模咁爆呀爆。

醫護人員做到一頭煙

　　小朋友提早放年假，啲家長就頭痕喇！唔係人人都可以即刻請假陪佢哋㗎嘛！諗真啲，有得揀請唔請多一日假已經好幸福。一班醫護人員真係諗都唔敢諗，尤其係受流感高峰期影響最大嘅公立醫院醫護人員！Jenny日日睇到公立醫院病床爆滿嘅數字，都真係幾怵目驚心，有醫院試過病床使用率去到130%以上添呀！一名護士要同時對住十幾個病人，想花多啲心機照顧佢哋都冇辦法。

網民製圖諷刺醫管局堅離地！

拍片當解決？堅離地！

　　醫護人員日日都打仗咁款，醫管局有咩應對方法呢？原來竟然係叫啲名人拍片「向醫護人員打氣」！真係多謝晒喇！Jenny都唔知原來打氣就可以解決人手不足嘅問題，唔通條片有咩魔力，可以令大家好似打機咁唔識攰，即刻「一個打十個」？諗呢條「橋」嗰真係「天才」！

　　醫生組織「杏林覺醒」都喺社交網站話：「除咗『哦』之外，小編都唔知可以講咩好」。計Jenny話，要啲醫護人員花幾分鐘時間開你哋條片嚟睇，倒不如用嚟睇清楚啲病人牌板好過喇！醫管局總部不如以後搬去堅尼地城啦！