【晴報專訊】薛家燕前晚錄影《流行經典50年》，向來是開心果的家燕姐，有感疫情下港人壓力大，正構思開網台節目講笑話。不過她坦言自己聽得最多的是鹹濕笑話，擔心兒童不宜，所以會改為「少少鹹多多趣」的內容，希望紓緩大家的負面情緒。

薛家燕一身pink lady打扮，祝願大家牛年桃花暢旺。

　　前晚錄影的一集《流行經典50年》，將獲安排在年初三（下月14日）播出，所以一眾嘉賓及主持都穿上甚有新年氣氛的服飾。早前節目停播接近一個月，薛家燕說：「好多觀眾問節目係咪停咗，其實之前只係遷就劇集大結局而暫停。」適逢年初三撞正情人節，家燕姐笑說：「所以今集邀請幾對情侶同夫婦做嘉賓，我就單獨亮相，就係話畀大家聽『仲有希望』。」情人節已經有人約？她笑答：「嗰日係赤口呀，費事嗌交啦！」

　　提到疫情下不少港人有負面情緒，家燕姐正構思在網上講笑話娛樂網民：「希望呢個節目可以紓緩大家情緒，我都試過隔離14日，嗰段期間情緒好低落，無得出街，最後都忍唔住喺屋企照化粧set頭扮得靚靚，心情先好啲，所以要做一啲事畀自己支持同鼓勵。」她坦言被女兒潑冷水指笑話「唔夠貨」：「因為好多聽埋聽埋嘅都係鹹濕笑話，我就過濾下，等個笑話無咁鹹濕先可以出街。」

唔擔心馬浚偉打對台

馬浚偉前日正式開設藝術教育中心，邀得羅冠蘭（左）及羅乃萱擔任顧問。

　　另外，馬浚偉開辦藝術教育中心培育演藝人才，本身開設「家燕媽媽藝術中心」的家燕姐表示相當歡迎：「其實我間學校都做咗十年，發覺小朋友係要好細個就開始栽培，唔一定要捧明星，我辦學都係想小朋友唔好埋沒天份，仲會教佢哋做人嘅道理。」