• |
  • 極速報價
  • |
  • 會員
  • 產品服務 / 串流版
  • 設定

20/05/2021

地獄減肥法 陳庭欣日飲4公升水嘆傷身

  • 加入最愛專欄
  • 收藏文章

  【晴報專訊】藝人靠外表搵食,平日做好身材管理外,有時更因工作需要,要在極短時間內減肥,難度極高。不少藝人自有一套地獄減肥法,陳庭欣(Toby)曾利用排水法快速瘦身,但她坦言極速減肥不健康,叮囑大家不要胡亂仿效,其實平日多運動及健康飲食,才是正確減肥王道。

 

陳庭欣認為從適量運動及均衡飲食著手,減肥已經大有效果。

陳庭欣與富商男友Benny同樣熱愛運動。

 

  陳庭欣向來身形fit爆,她坦言有時工作需要曬身材,令她不得不瘋狂減肥:「試過有次臨時收到通知,兩星期後要出發拍攝《3日2夜》,仲要著泳衣出鏡。」她自言本身手長腳長有優勢,但要做運動操練腹肌:「知道自己要著泳衣拍攝,平時一組運動做四次,嗰排就做足八次。我又試過飲水減肥法,嗰幾日不停飲水,一日飲四公升水,但完全唔食嘢,呢種排水方法一定要預早五日之前開始做,唔可以多亦唔可以少,因為不停灌水嘅關係,去廁所次數好頻密,連續幾日將身體內嘅水份排走,成個人就好乾身。」

 

陳庭欣不時穿三點式曬身材,但背後下了不少苦功。(IG圖片)

 

  不過Toby經歷這些地獄式減肥法後,大感吃不消,不建議大家效法。她說:「我依家年紀大,唔會再咁瘋狂減肥,擔心好易暈低。依家keep住每星期有適當嘅運動量,咁就唔使突然要瘋狂減磅咁傷身;飲食方面,如果之前食多咗,之後就會食番清淡啲,自己會平衡番。」

 

黃建東︰跟Sammi食西蘭花減30磅

 

瘦身成功的黃建東,早前與凍齡媽咪亮相《日日媽媽聲》。(IG圖片)

 

  參選港男出身的黃建東,讀書時期已開始嘗試各種減肥方法:「中學嗰陣我跟鄭秀文(Sammi)個減肥餐單,雖然係女仔嘅餐單,但係當時自己貪靚,唔理個餐單係咪work都照食,呢個餐單淨係食西蘭花同埋木瓜,食咗幾個月,足足瘦咗30磅,依家諗番都覺得自己好癲。」

 

黃建東努力健身操麒麟臂。(IG圖片)

 

  黃建東坦言試過減肥減到走火入魔:「試過減肥期間忍唔住食咗個鬆餅,食完覺得好內疚,返屋企即刻扣喉,嗰時知道自己減到走火入魔,提醒自己真係要抽離。」入行後一度變肥仔的他,現在學懂節食,亦盡可能準備健康飯盒:「主要都係白烚嘢食,盡量少落油,維持咗一段時間,都減咗五、六磅,有拍攝工作前都會忍口。」

 

湯洛雯:HIIT運動瘦身

 

湯洛雯無論肥瘦一樣靚女。

 

  湯洛雯(靚湯)自從與馬國明蜜運以來,經常被指幸福肥,靚湯甜笑自認「肥底」︰「開心就肥,唔開心仲肥,因為會食好多嘢。」她指吃甚麼十分重要:「好多人會透過驗血測試,了解自己用邊種方法去減肥,對我嚟講每個人體質唔同,每種方法效用都唔一樣。好似我細妹(湯樂瑤)唔食三日就瘦到變排骨,但我唔食三個月都無乜意思。」

 

妹妹湯樂瑤(右)得天獨厚,少吃一點便能減肥。(IG圖片)

 

  靚湯坦言十分為食:「我本身鍾意食甜,所以一定要戒口,連澱粉質唔可以食。不過其實好難戒甜,因為會唔開心,雖然可以用代糖,但又覺得唔健康。另外,每日要多飲水,唔好飲凍水,試過最多減咗20磅。」對靚湯來說,做運動始終最有用:「我做運動最work,試過做45至60分鐘帶氧運動。我亦聽過一種叫HIIT嘅高強度間歇運動減肥法,做一set五分鐘運動,之後休息五分鐘,每星期做三、四日,我都會試下。」

 

陳山聰︰為一條褲決心減肥

 

陳山聰帶兒子Jaco游水,培養囝囝運動興趣。

 

  陳山聰近年積極練跑及健身,大隻有型,但他曾經有段時間胖了十幾磅,能令他下定決心減肥,竟全因一條褲。山聰說︰「七、八年前拍《天梯》,嗰時要增肥十幾磅,亦係我認為最艱辛嘅時候。有日想著最心愛嗰條褲,點知拉上去扣唔到褲鈕,心諗『唔掂喎!條褲我好鍾意㗎嘛』,於是激起鬥志,逼自己每日跑步,由五公里開始,到十公里係咁跑,一個月後就著得番條褲。」

 

陳山聰拍攝《十八年後的終極告白》時曾大曬結實腹肌。(IG圖片)

 

  山聰一日三餐亦會按照健康餐單進食:「朝早一碗麥皮,下晝烚菜烚雞肉,晚餐烚菜烚雞肉同烚魚,當然中間都會有引誘,但每次想變得好fit嘅時候,就會跟呢個餐單,否則都會容許自己放縱下。」

 

轉載自: 晴報

全新消閒節目《周一加油站》,幫你踢走悶氣,重新注入元氣! ► 即睇

我要回應

放大顯示
周一加油站

精選文章

  • 生活
  • DIVA
  • 健康好人生