【晴報專訊】人氣男團MIRROR隊長楊樂文（Lokman）、副隊長江熚生（AK）及成員王智德（Alton）昨日到銅鑼灣出席電影《蜘蛛俠︰不戰無歸》主題展，吸引大批粉絲到場圍觀，企滿三層商場。三人在活動上有如蜘蛛俠上身，又跪地又扮chok，其中以Alton的甫士最為突出，大放笑彈。

（左起）Alton、Lokman和AK在現場表現得十分興奮。

　　楊樂文、江熚生及王智德昨日出席活動，吸引大批「頭巾兵團（Lokman粉絲）」、「生粉（AK粉絲）」及「蛋白粉（Alton粉絲）」到場支持，企滿三層商場。活動不設訪問，但三子相當識做，活動期間擺出多個蜘蛛俠招牌甫士，他們又拿着各自設計的玩偶拍照，表現得相當興奮；及後，三子逐一影單人照，Lokman和AK拍照過後，最後上台的Alton「啪」一聲跪地擺甫士，令全場爆笑，連企在台下的AK也大笑出來，Alton笑說︰「要扮蜘蛛俠嘛，咁咪擺個勁啲嘅pose囉。」

花姐做運動辛苦過生仔

Alton扮蜘蛛俠擺甫士，但似乎更像「黑寡婦」。

　　最後三人影合照時，AK笑謂︰「我哋先擺一個正經嘅（甫士）畀大家影相。」未幾三人即蜘蛛俠上身，擺出蜘蛛俠招牌動作，AK更半蹲做出蜘蛛俠放蜘蛛絲的手勢，而Lokman和Alton卻像跳舞多於蜘蛛俠，爆笑非常。

花姐食甜品前做運動，看來過程相當辛苦。

　　另外，由AK主持的節目《Have A Sweet Gym》昨晚一集請來MIRROR經理人黃慧君（花姐）任試食嘉賓，惟花姐在品嘗甜品前，需要跟私人教練學做划艇的健身訓練。雖然花姐曾取得獨木舟教練資格，但面對各式各樣的訓練也大叫辛苦，更比喻辛苦程度如同生仔，花姐哭訴︰「我前世做錯咗啲乜嘢事？我都係做咗個《全民造星》啫。」而花姐完成訓練後，終可品嘗甜品，但她一度質疑甜品是否由AK親手炮製，AK則堅稱是親手製作，希望報答花姐一直以來的照顧。