• |
  • 極速報價
  • |
  • 會員
  • 產品服務 / 串流版
  • 設定

15/12/2017

修改議事規則後 建制派真的無憂嗎?

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  Tina執筆之時,有關修改議事規則嘅辯論已經進入尾聲。過程比起想像之中利落,建制派一直轉變策略,由計劃每人都發言表態,到後來只係畀各黨代表發言,希望「快刀斬亂麻」,果然今個星期開第三日會,建制派就完成呢個「偉大使命」。

 

  完成修改議事規則之後,泛民可以動用嘅制度武器幾乎係全面繳械,但實情又係唔係真係咁差?建制派又係唔係飲得杯落呢?

 

  按立法會前主席曾鈺成日前喺報章撰文所指,按《基本法》第75條規定,立法會會議法定人數為不少於全體議員的二分之一,即係立法會大會開會人數郁都唔郁得,而建制派提出一個偷換概念嘅做法,只係降低審議法案階段嘅「全體委員會」法定人數,由35降到去20,所以過往喺立法會會議上出現嘅點人數同流會情況,不會受到修改《議事規則》影響。

 

  大主席(曾鈺成永遠係Tina心入面嘅大主席)可以話係一語中的。過往試過好多情況,成個會議廳係得返一個議員企喺度,無錯,係得發言嘅一個議員喺度;當時環境無咁緊張,泛民唔係瘋狂點人數當然無問題,但係修改議事規則之後,泛民必然老奉唔夠人數就會響鐘,而建制方面好肯定眾人都抱住「20個好易夠數」,個個無晒戒心,泛民一進建制一退之下,會出現咩境況?Tina估計,泛民每次會議都會瘋狂點人數;而建制派好有可能要長期編定一個最少20人喺議會嘅更表(40名建制即最少一半留守會議廳),否則20人一樣照流會。但問題嚟喇,建制派分門分派,真係做到個個齊心?

 

  話個辯論期間小插曲大家知。之前講過建制派一直轉變策略,其實一開始所有建制派議員都磨好晒劍,準備發言直插泛民心臟,但由於「上面」想盡快過咗議案,建制派領導就喺群組內要求限制建制派發言次數。有部分「好鬥」議員面對禁言都非常不滿,據聞佢地仲不理禁言令,最終都係撳鐘抽泛民水。呢件事已經睇到,槍口一致對外都未必齊心,更何況編更表?所以往後新形勢未必如建制諗嘅咁順利呀!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

我要回應

放大顯示
師傅靈靈法

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ