• |
  • 極速報價
  • |
  • 會員
  • 產品服務 / 串流版
  • 設定

06/01/2020

中聯辦主任「換人」謎思

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

 

  呢篇係新年第一稿,先同各位經濟通讀者講句新年快樂,無論大家係咩政治立場,都希望香港可以否極泰來。

 

  新年第一稿,估唔到係寫一單咁爆嘅新聞,就係阿爺駐香港嘅最高話事人-中聯辦主任突然換人,王志民被免職,由大部分香港人可能連名都未聽過嘅駱惠寧上任。今次阿爺突然換中聯辦主任呢個要職,要好小心從兩個層面去睇,第一係王志民「衰乜」,第二就係點解會由駱惠寧接手。

 

  先從王志民入手,坊間普遍評論認為,王志民今次連新位都未確定就被調走,半分情面都唔畀,肯定係「所作所為」已經觸怒阿爺,而佢最大失誤,肯定就係同誤判區議會選情有關。之前Tina都講過,建制派上報嘅選情係非常嚴峻,但係最終建制派大佬以至係中聯辦同阿爺講嘅又似乎係另一套,直頭係過於樂觀,據聞選舉結果同阿爺所得嘅預計落差太大,王因此而要「背鍋」。

 

  但有熟知內地官場文化嘅內地朋友就認為,今次香港發生咁大件事,唔會純粹單單係一件半件事誤判; 極可能係由修例事件發展至今,中聯辦由開始去到最近,做過嘅一系列重要匯報同埋最終決策同研判都出錯,令到阿爺認為失誤太過嚴重,先會激發阿爺要換人。

 

  至於搵駱惠寧上任就更加耐人尋味。駱「政績」顯赫,曾經擔任青海山西省嘅省委書記,由兩省前書記出任中聯辦主任,係前所未有。而駱本身年紀都唔細,已近退休年齡,仍然畀佢喺呢個動盪時刻上任,證明就係要委以重任去處理香港問題。

 

  不過有人就話,駱對香港似乎唔太熟,點解搵佢嚟?Tina 諗: 一張白紙,同根深蒂固嘅「香港幫」無任何連繫,方便全面整頓,正可能係阿爺最想做嘅嘢,同時亦解釋到點解要急急換王志民。睇嚟西環可能會好大變革,至於香港官場如何演變,下回分解。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet TV頻道現已登場,多元化財經及消閒影片輪流送上! ► 即睇

我要回應

你可能感興趣

放大顯示
保哥快趣煮

精選文章

  • 生活
  • DIVA
  • 健康好人生