• |
  • 極速報價
  • |
  • 會員
  • 產品服務 / 串流版
  • 設定

22/02/2021

有意從政要考「愛國者」牌照?

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

 

  本周政壇焦點,除咗係星期三(24日)嘅財政預算案睇下財爺點樣諗計減少開支增加收入幫補下庫房以外,另一聚焦嘅地方就係香港未來嘅選舉制度,究竟喺阿爺嘅意旨之下,將會有幾翻天覆地嘅改變。

 

  身兼港澳工作領導小組常任副組長嘅港澳辦主任夏寶龍今早發表講話,指反中亂港分子之所以能在一國兩制下嘅香港興風作浪、坐大成勢,原因係多方面,其中一個,就係「愛國者治港」原則無得到全面落實。夏寶龍同時重申,喺香港特區政權架構中,身處重要崗位、掌握重要權力、肩負重要管治責任人士,包括立法機關,必須係堅定嘅愛國者。

 

  喺阿爺今時今日嘅心態,要愛國者先能夠治港,理所當然,但問題就係,點樣先能夠令到有直選嘅香港,選出嚟嘅人都百分百係「愛國者」?咁細節嘅嘢,夏寶龍無再跟進,但之前Tina已經講過,親建制早已盛傳,阿爺有意改變現行嘅選舉遊戲,以確保當選人係「愛國者」,所以民建聯先會早早提出「變革香港」嘅口號,好明顯就係為阿爺嘅新講法開路。

 

  要確保選舉嘅勝選者係百分百「愛國者」,來來去去都係得兩個方法。一,就係確保到入閘參選嘅人都係「愛國者」,唔愛國的話,連選嘅資格都無;二,就係確保到選民能夠喺咁多候選人之中,揀到「愛國者」出嚟做議員。

 

  講就當然係容易,要確保到以上兩點,隨非行回頭路搞返委任制度,否則都好難百分百保證所有直選當選人係「愛國者」。香港現行嘅直選制度,係行緊比例代表制,當年設立呢個制度就係為咗「愛國議員」喺議會有一席位;今時今日,比例代表制亦確保到阿爺眼中唔愛國嘅,一樣可以喺議會發聲,就算轉返單議席單票制,區區選一至兩位議員,亦無可能區區都係「愛國者」贏晒。

 

  有建制派坦言,轉委任制度就無乜可能,反而個別功能組別嘅選舉方式,例如教育、法律、會計等等會唔會有轉變,呢個就係未知之數。不過左計右計,裝返好個大閘就最實際,只要有一個完善嘅入閘制度,咁就可以確保到無論係立法會直選抑或係區議會選舉,任何嘅當選人都係「愛國者」。呢位建制派仲講笑咁話:「一係想參選嘅就去中聯辦考個『愛國者』牌照,考到牌嘅就可以參加各級選舉甚至出任公職;考唔到就係咁先!」

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

我要回應

你可能感興趣

放大顯示

精選文章

  • 生活
  • DIVA
  • 健康好人生